"Mən hər zaman media ilə bağlı məsələləri Milli Məclisdə qaldırmışam”.
Bu barədə "Sherg.az”a Azərbaycan Mətbuat Şurasının sədri, millət vəkili Əflatun Amaşov bildirib.
Deputat diqqətə çatdırıb ki, son günlər onlayn medianın dövlət tərəfindən maliyyələşməsi gündəmdədir:
"Bu məsələni diqqətdə saxlayırıq. Bir müddət əvvəl Kütləvi İnformasiya Vasitələrinin (KİV) Əlavə Dəyər Vergisindən (ƏDV) azad olunması barədə müzakirələr aparıldı. Bu problemlərdən çıxış edərək, reklam bazarının genişlənməsi ilə bağlı təkliflər verilir. Mənə elə gəlir ki, müharibə aparan dövlətdə informasiya kifayət qədər maliyyə ayrılmalıdır. Azərbaycan hazırda müharibə şəraitində yaşayır və ordumuz regionun ən güclü ordusudur.
Ərazilərimiz düşməndən sülh yolu ilə alınmasa, əminəm ki, torpaqlarımızı hərbi yolla işğaldan azad edəcəyik. Ancaq bununla yanaşı informasiya müharibəsində də gücümüzü artırmalıyıq. Bu sahədə Azərbaycan həqiqətlərinin dünya ictimaiyyətinə çatdırılmasında media vasitələri əlindən gələni etməlidir. Bu məsələni hər zaman diqqətdə saxlamalıyıq ki, Azərbaycan mediası maliyyə baxımından daha güclü olsun.
Onlayn jurnalistika Azərbaycana edilən bütün informasiya hücumlarının qarşısında dayanır. Elektron mətbuat Azərbaycanın imicini kifayət qədər qoruya bilir və Azərbaycan həqiqətlərini dünya ictimaiyyətinə çatdırır. Sözsüz ki, bunu mütəmadi inkişaf etdirməliyik.
Mənim həm Mətbuat Şurasının sədri, həm də Milli Məclisin deputatı kimi bütün fəaliyyətim bununla bağlıdır. Müzakirələr və edilən təkliflərlə bağlı isə sözsüz ki, gözləntilər var. Bu gün kifayət qədər müsbət addımlar atılır. Düşünürəm ki, verilən təkliflər də öz bəhrəsini verəcək”.
Ayyət Əhməd
