"Ünvanlı sosial yardım insanlarda ələbaxanlıq yaradır”.
Bu barədə "Sherg.az”a yaxın 6-7 il ərzində ünvanlı sosial yardımın ləğv edilməsi məsələsinə münasibət bildirərkən iqtisadçı - deputat Vahid Əhmədov bildirib.
O qeyd edib ki, insanların iş yerləri ilə təmin olunmasına daha çox çalışmalıyıq:
"İnsanların məşğulluğu təmin edilərsə, ünvanlı sosial yardıma ehtiyac qalmaz. Azərbaycanda hazırda buna ehtiyac qalmaqdadır. Ona görə də ehtiyac meyarı müəyyən edilib. Lakin dövlət başçısı tərəfindən irəli sürülən xüsusi proqram bunun aradan qaldırılmasını nəzərdə tutur. 6-7, bəlkə də 10 ilə ünvanlı sosial yardım aradan qaldırılacaq.
Özünü məşğulluq fondu tərəfindən ailələrə təklif olunur ki, vəsait ayrılsın, ticarətlə, bizneslə, kənd təsərrüfatı ilə məşğul olmaq istəyənlərə şərait yaradılsın. Seçilən iş insanlara təhvil verilir, nəticədə həmin sahə gəlir gətirirsə, ailələri ünvanlı sosial yardım alanlar siyahısından çıxarırlar.
Bu barədə praktika da mövcuddur. Göyçay və digər rayonlarda ölkə başçısının ayırdığı vəsait hesabına təklif işlənir. Bu, normal vəziyyətdir, bir sıra dövlətlərdə də mövcuddur. Ölkəmizdə həmin təcrübənin tətbiq edilməsi insanların işə daha çox meylli olmasına səbəb ola bilər”.
Qeyd edək ki, əmək və əhalinin sosial müdafiəsi naziri Səlim Müslümov bununla bağlı ünvanlı sosial yardımlar alan ailələr üçün özünüməşğulluq proqramlarının icrasına başlanıldığını deyib. Nazirin sözlərinə görə, bu proqramların icrası məqsədilə ötən il özünüməşğulluq sisteminə keçidlə bağlı proqramların icrasına 6 milyon manat ayrılmışdı və bu proqramların icrası 8 minə yaxın insanı əhatə edib.
Aysel Aslan
