2016-cı ildə Azərbaycanda 2015-ci illə müqayisədə sanitar-gigiyena normalarına cavab verməyən iş yerlərində çalışanların sayı artıb. Bununla bağlı Azərbaycan Həmkarlar İttifaqları Konfederasiyasının (AHİK) 2013-2017-ci illər üzrə hesabatında qeyd olunub.
Hesabata əsasən, sanitar-gigiyena normalarına cavab verməyən iş yerlərində çalışan işçilərin sayı 3,5 faiz artıb. Həmçinin 2017-ci ildə aparılan nəzarət-profilaktika işləri nəticəsində yoxlanmış həmkarlar ittifaqlarının xidmət dairəsində olan müəssisələrin hər 12 işçisindən birinin həyatı üçün risk faktoru aradan qaldırılıb.
Hesabatda qeyd olunur ki, son 5 il ərzində AHİK-ə üzv təşkilatlara 786 484 ərizə və şikayət daxil olub. AHİK və üzv təşkilatlar tərəfindən görülən işlər nəticəsində daxil olan ərizə və şikayətlərin 95,2 faizi müsbət həll olunub. Əmək hüquqlarının pozulması ilə əlaqədar AHİK və üzv təşkilatlara 5 il ərzində daxil olan 18 916 müraciətin 3145-i işə bərpa ilə əlaqədar olub. Onların həlli ilə bağlı 97 məhkəməyə müraciət olunub. Bu müddətdə 983 nəfər öz işinə bərpa edilib.
Mövcud durumla bağlı "Şərq”ə danışan tibb elmləri doktoru, professor Adil Qeybulla hazırda ölkəmizdə sanitar-gigiyena qaydalarına nəzarətin aşağı səviyyədə olduğunu deyib. Professorun fikrincə, nəzarət formal şəkildə ola bilər, lakin rəsmi olaraq nəzarətdən danışmaq mümkün deyil:
"Sovet dövründə sanitar-gigiyena qaydaları ilə bağlı Sanitar Epidemioloji Stansiyalar, həmçinin qida gigiyenasına nəzarət edən idarə var idi. O zaman qida gigiyena idarəsinə "siçan idarəsi” də deyirdilər. İdarə sanitar epidemioloji vəziyyətlə bağlı siçan əleyhinə dərmanlar paylayırdı və adı "siçan idarəsi” kimi qalmışdı.
Əvvəllər ictimai iaşə obyektlərinə nəzarət olub. Həm də o vaxtlar şadlıq evləri, xüsusi mülkiyyətlər çox deyildi. Bütün bunlar dövlətin nəzarətində idi. Sovet quruluşu dağılandan sonra nəzarət sistemi nisbətən zəiflədi. İndi Qida Gigiyenası Agentliyi yaradılıb. Əslində bu agentliyi yaratmaqda məqsəd ərzaq təhlükəsizliyi konsepsiyası çərçivəsində yer alır. Məqsəd ərzaq təhlükəsizliyini təmin etməkdir. Xaricdən gələn ərzaqların keyfiyyətinə və daxildə ictimai iaşəyə nəzarət olunur. Hər bir rayonda epidemioloji sanitar idarələr var. Bu idarələr hazırda təmizliyə nəzarət edirlər. Belə qurumlar mövcud olsa da, onların nə dərəcədə effektiv işlədiklərini demək çətindir”.
Yeganə Bayramova
