"Azərbaycanın sərhədlərini ölkəmizin icazəsi, razılığı olmadan pozan şəxslər cinayətkar olduğundan, ya həbs olunur, ya da qara siyahıya salınırlar".
Bunu "Sherg.az”a Fransa Prezidenti Emmanuel Makronun Dağlıq Qarabağ ərazisinə səfər planlarından danışarkən millət vəkili Elman Məmmədov söyləyib.
Onun sözlərinə görə, sadə vətəndaş, yaxud vəzifəli şəxs olmasından asılı olmayaraq, hər kəsə eyni cəzalar tətbiq edilir:
"İran, Rusiya və başqa dövlətlərlə olan sərhədlərimizi məqsədindən asılı olmayaraq pozan şəxs qanunla cəzalandırır. Fransa prezidenti də Azərbaycanın icazəsi olmadan Dağlıq Qarabağa səfər edəcəksə, cəzalana bilər. E.Makron bu cür yanlış addıma yol verərsə, həm də separatizmə dəstək vermiş olur.
Məlumdur ki, Azərbaycan torpaqlarının 20 faizinin işğal olunması, Fransa kimi ölkələrin maliyyə yardımı, dəstəyi ilə gerçəkləşib. Erməni lobbisinin maddi yardımının da rolu qeyd edilməlidir. Fransa prezidenti istəyirsə, Ermənistana səfər edə bilər. Amma bir daha qeyd edirəm Azərbaycanın icazəsi olmadan Dağlıq Qarabağ ərazisinə səfər etmək qanun pozuntusudur. Mənə belə gəlir ki, Makron bu səhvə yol verməz !”.
Qeyd edək ki, erməni lobbisi tərəfindən Azərbaycanın işğal olunmuş Dağlıq Qarabağ bölgəsinə dəvət olunan Emmanuel Makron bir gün bu səfəri gerçəkləşdirəcəyini və həmin gün münaqişənin həll olunduğunu söyləyəcəyinə ümidvar olduğunu bildirib.
Aysel Aslan
