"Azərbaycanın gəlirlərinin çoxu səhiyyə vasitəsilə İran və Türkiyəyə gedir. İmkanlı insanlar tibbi problemlərini həll etmək üçün Türkiyəyə, imkansızlar isə İrana üz tutur"
"Ölkədə həyat standartlarının yüksəldilməsinə ehtiyac var".
Bunu "Sherg.az"a gələn ilin dövlət büdcəsi haqqında müzakirələrdən danışarkən iqtisadçı - ekspert Rəşad Həsənov söyləyib.
O xatırladıb ki, 2016-cı ildə 12,5, 2017-ci ildə isə 14 faiz inflyasiya qeydə alınıb:
"Əvəzində isə nə dövlət, nə də qeyri-dövlət sektorunda əməkhaqqılar müvafiq şəkildə artıb. Bu isə əhalinin gəlirlərinin dəyərini kəskin aşağı salır. O insanlar ki, minimum əmək haqqı səviyyəsində qazanırdılar, demək olar ki, onların əmək haqqı yoxa çıxır. Bazar bunu əridir. Ona görə, standartların dəyişdirilməsinə ehtiyac var. İndiyə qədər infrastruktur sahəsinə yüksək maliyyə ayrılması başa düşülən idi. Amma artıq bu işlərə ayrılan vəsaitlərin həcminə daha düzəldilmiş formada yanaşmalıyıq.
Ötən ilin dövlət büdcəsi ilə müqayisədə 2018-ci ildə infrastruktur xərcləri az qala 2 dəfə artırılıb. Bundan sonrakı dövrdə digər məsələlərə də diqqət ayrılmalıdır. Təcrübə də göstərir ki, heç bir istiqamətdə yatırılan investisiya insan kapitalına yatırılan investisiya qədər gəlir vermir. Yaponiya, ABŞ, Hollandiya kimi şirkətlərin iqtisadiyyatı insan resurslarına dayanır. ABŞ-ın bir şirkəti az qala Rusiyanın bütöv iqtisadiyyatından böyükdür.
Belə müqayisə olunmaz faktlar var. Məsələn, xəstəxanın tikilməsi vacib infrastruktur layihəsidir. Lakin həmin xəstəxanada işləyə biləcək həkimlər də olmalıdır. Azərbaycanın gəlirlərinin çoxu səhiyyə vasitəsilə İran və Türkiyəyə gedir. İmkanlı insanlar tibbi problemlərini həll etmək üçün Türkiyəyə, imkansızlar isə İrana üz tutur.
Bütün bunları nəzərə aldıqda görürük ki, artıq birmənalı şəkildə neft və qaz gəlirlərinin insan kapitalının inkişafına yönəldilməsinə ehtiyac var”.
Aysel Aslan
