Əmək və əhalinin sosial müdafiəsi naziri Sahil Babayev Prezidentin maaş artımları ilə bağlı sərəncamlarından danışıb.
Sherg.az-ın xəbərinə görə, nazir jurnalistlərə açıqlamasında deyib ki, maaş artımları ilə bağlı aparılan xərc dinamikasının hesablanması birbaşa olaraq göstərir ki, biz artımların inflyasiyaya hər hansı bir ciddi təsirini gözləmirik:
"İnflyasiyaya hər hansı bir xərc artımının təsiri nisbətlə götürülən məsələdir. Yəni ölkəyə əlavə pul kütləsinin daxil olması, pul emissiyasının həyata keçirilməsi gözlənilmir. Dövlət büdcəsinin artan gəlirləri hesabına bu xərclər ödənilir və ümumilikdə bütün xərcin məbləğinə nəzər saldıqda onun ÜDM-dəki və eyni zamanda, pərakəndə ticarət dövriyyəsindəki payı yüksək deyil. Ona görə də artıq dünən maliyyə naziri bildirdi ki, ciddi inflyasiya təsirini gözləmirik və bunu nəzarətdə saxlayacağıq.
Artıq ilk arqumentimiz də öz təsdiqini tapıb. Bu ilin mart ayından minimum əmək haqları artırılıdı, minimum pensiyalar artırıldı. Üç ay keçməsinə baxmayaraq, Azərbaycanda bu gün inflyasiya göstəricisi 2,5 faizdir. Artıq bunun özü bir sübutdur ki, ciddi inflyasiya göstəricisi təzyiqi yoxdur. Amma hər bir halda istənilən makroiqtisadi siyasət zamanı bu, hər zaman nəzarətdə saxlanılan məsələdir”.
Anar
