"Mərkəzi Bank ötən il üzən məzənnəyə keçidi elan etsə də, bunu reallaşdırmaq mümkün olmadı”.
Bu barədə "Sherg.az”a bəzi ekspertlərin tam üzən məzənnəyə keçidin ziyanları barədə fikirlərini şərh edərkən iqtisadçı - ekspert Vüqar Bayramov bildirib.
O qeyd edib ki, 2017-ci ildə Mərkəzi Bank valyuta bazarında tənzimləməni həyata keçirmək üçün məzənnəyə təsir etməli oldu:
"2020-ci ildə Mərkəzi Bank üzən məzənnəyə keçidi reallaşdıra bilər. Bunun üçün valyuta bazarının liberallaşdırılmasına ehtiyac var.
Valyuta bazarının liberallaşmasını təmin etmək üçün neftdən asılılığın aradan qaldırılması vacibdir.
2020-ci ildə tam üzən məzənnə rejiminə keçid reallaşarsa, bu həmin vaxta qədər neftdən asılılığın hansı səviyyəyə qədər azaldılmasından, ölkəyə daxil olan valyutanın artması və neftin həmin dövrdəki qiymətindən asılı olacaq. Neftin qiyməti birbaşa tam üzən məzənnəyə keçidə təsir göstərəcək.
Bu gün hətta qonşu ölkələrdə belə tam üzən məzənnə rejimi tətbiq olunur. Dünya ölkələri, tam üzən məzənnə rejimində fəaliyyət göstərən dövlətlər bununla valyutaların kursunu müəyyənləşdirməyə çalışırlar. Azərbaycanda da bu mərhələli tətbiq olunsa, bazar kursunun müəyyənləşməsi mümkün olacaqdır”.
Qeyd edək ki, Monitorinq və Qiymətləndirmə İqtisadi İslahatların Təhlili və Kommunikasiya Mərkəzi tərəfindən hazırlanan "Azərbaycan Respublikasında kommunal xidmətlərin (elektrik və istilik enerjisi, su və qaz) inkişafına dair Strateji Yol Xəritəsinin icra vəziyyəti"nin 2017-ci il üzrə illik monitorinq və qiymətləndirmə hesabatında 2020-ci ildə Azərbaycanda tam üzən məzənnə rejiminin tətbiq olunacağı vurğulanıb. Hesabatda qeyd olunub ki, Mərkəzi Bank bu il üçün tam üzən məzənnəyə keçidlə bağlı tədbirlər planının icrasına başlamalıdır.
Aysel Aslan
