"Artıq 4 aya yaxındır ki, Ermənistanda "küçə hakimiyyəti” saraya daxil olub. Baş nazir Nikol Paşinyan qarşısına qoyduğu məqsədə nail olmağa çalışır”.
Bunu "Sherg.az”a siyasi elmlər namizədi Zaur Məmmədov deyib.
Ermənistandakı iqtisadi böhranı dəyərləndirən politoloq bildirib ki, əslində Paşinyanı hakimiyyətə küçə gətirsə də, onun arxasında erməni diasporasının durduğu hamıya bəllidir:
"Aparılan siyasət ölkəni Rusiyanın təsir dairəsindən çıxarmağa hesablanıb. Lakin Kremlin buna imkan verəcəyini düşünmək sadəlövhlük olardı. Paşinyan parlament seçkisində qalib olmaq üçün siyasi rəqiblərini fiziki və maliyə cəhətdən zəiflətməkdədir. Bu yaxınlarda Paşinyanın Qazaxıstan prezidenti Nursultan Nazarbayevlə telefon danışığı oldu. Paşinyan yaxşı başa düşür ki, Belarus və Qazaxıstan kimi dövlətlər istər onun üzv olduğu KTMT-da, istərsə də digər iqtisadi bloklarda böyük çəkiyə malikdir.
Şübhəsiz ki, Ermənistan iqtisadiyyatının dirçəlməsi üçün bu ölkələrlə sıx işbirliyinə ehtiyac var. Lakin, Dağlıq Qarabağ münaqişəsinin nizamlanmaması, Rusiya-Ermənistan münasibətlərinin soyuqlaşması İrəvanın manevr imkanlarını daraldan ən ciddi amillərdir”.
Məlumat üçün deyək ki, Ermənistanın Dağlıq Qarabağ münaqişəsindən dolayı blokadaya düşməsi, təcrid olunaraq iqtisadi regional layihələrdən kənarda qalması düşmən ölkənin iqtisadiyyatını çökdürüb. Hazırda özünə nəfəslik axtaran düşmən ölkə Qazaxıstanla yaxınlaşmağa, ABŞ-Türkiyə gərginliyindən yararlanmağa çalışır. Paralel olaraq ABŞ-dakı erməni lobbisi Tramp-Paşinyan görüşünə nail olmağa çalışırlar.
İsmayıl
