Ötən gün Parisdə Birinci Dünya müharibəsinin bitməsinin 100 illiyi ilə bağlı keçirilən tədbirdə çıxış edən Ermənistan baş naziri Nikol Paşinyan dünya ictimaiyyətini aldatmağa səy göstərib. İşğalçı ölkənin baş naziri "sülhdən” dəm vuraraq, İrəvanın təcavüzkar mövqeyini gizlətmək istəyib. Həmçinin, Dağlıq Qarabağ münaqişəsinin mahiyyətini yanlış təqdim edərək, "xalqların öz müqəddəratını” həll etmə məsələsini yenidən gündəmə gətirib. Paşinyanın növbəti sərsəm açıqlamaları Azərbaycanın Xarici İşlər Nazirliyi tərəfindən sərt reaksiya ilə qarşılanıb.
Nazirliyin mətbuat xidmətinin rəhbəri Leyla Abdullayeva bildirib ki, Paşinyanın Paris Sülh Forumunda çıxışı Ermənistanın xarici siyasəti ilə tamamilə ziddiyyət təşkil edir. Qurum sözçüsü vurğulayıb ki, məhz Ermənistan tərəfi beynəlxalq hüququn fundamental prinsiplərini pozaraq Azərbaycan ərazilərini işğal edib. Yüz minlərlə azərbaycanlını öz evlərində yaşamaq hüququndan məhrum qoyub: "Dövlətlər xalqların öz müqəddəratını təyin etməsi hüququna BMT Nizamnaməsinin məqsəd və prinsiplərinə uyğun olaraq hörmət etməlidir. Beynəlxalq Forumlarda çıxış edərək sülhdən danışmaq, əlbəttə yaxşıdır. Lakin ən vacibi sadəcə bəyanatlar verməklə kifayətlənməmək, verilən bəyanatlara uyğun davranmaqdır. Ermənistanın özünün daha yaxşı gələcəyi Azərbaycan ərazilərinin işğalına son qoyulması və məcburi köçkünlərin öz evlərinə geri qayıtması ilə əlaqədardır”.
Paşinyanın beynəlxalq ictimaiyyət qarşısında göstərdiyi şou ilə bağlı "Şərq”ə danışan politoloq Zaur İbrahimli bildirib ki, Ermənistanın baş naziri Paşinyan saxta siyasətdə və populizmdə çox bacarıqlı olduğunu dəfələrlə nümayiş etdirib. Bu amil onun ən güclü "silahı” sayılır:
"Paşinyanın Paris Sülh Konfransında çıxışı da populizmin bariz nümunəsi sayıla bilər. Baş nazir çıxışında bildirib ki, "insanlıq nöqteyi-nəzərindən müharibədən heç kim udmur. Müharibə ancaq ağrı-acı gətirir”. Maraqlıdır, Paşinyan bunları kimə deyir?! Bu həqiqəti elə ilk növbədə Ermənistanın siyasi elitası və cəmiyyəti anlamalıdır. Reallıq odur ki, Paşinyan yenə öz sələflərinin yolu ilə gedir, dünya qarşısında "əbədi mərhumiyyətlərə məruz qalan xalq” obrazı canlandırmağa çalışır. Amma ermənilərin Cənubu Qafqaz xalqlarına, xüsusən azərbaycanlılara qarşı törətdikləri misli görünməmiş vəhşilikləri bu kontekstdə gizlətməyə, pərdələməyə çalışır”.
Analitikə görə, dünya artıq ermənilərin bu tərzinə öyrəşib:
"Ermənilərin xüsusiyyəti lətifələr predmetidir. Tanınmış şairlər, yazıçılar öz əsərlərində erməni xəstəliyini zaman-zaman vurğulayırlar, ironiya hədəfinə çevirirlər. Paşinyanın sonuncu çıxışı göstərir ki, Dağlıq Qarabağ məsələsi yeni hökumət üçün populizm predmetidir. Əlbəttə, belə məqamda Paşinyandan konstruktiv mövqe gözləmək əbəsdir. Belə gedərsə, Azərbaycan hərbi arqumentlərdən istifadə etmək məcburiyyətində qalacaq”.
İsmayıl
