Əməliyyat-axtarış fəaliyyəti həyata keçirənlərə yeni səlahiyyətlər verilə bilər. Məlumata görə, parlament bununla bağlı "Əməliyyat-axtarış fəaliyyəti haqqında” Qanuna dəyişiklik etməyə hazırlaşır. Yeni təklifdə "Əməliyyat-axtarış fəaliyyəti haqqında” Qanunun 10-cu maddəsinə əlavə və dəyişiklik edilməsi istənilir.
Layihəyə əsasən, qanunvericilik ilə müəyyən edilmiş əsaslar olduğu hallarda əməliyyatçılar hakimin qərarı olmadan həbs yerlərindən, yaxud mühafizə altından qaçmış şəxslərin yaxalanmasından ötrü yaşayış binalarına və ya digər qapalı tikililərə baxış keçirə biləcəklər. Qeyd edək ki, indiyədək bundan ötrü məhkəmə qərarı tələb olunurdu. Layihə parlamentin iclasına tövsiyə olunub.
Təklifi dəyərləndirən kriminalist-ekspert İlqar Altay "Şərq”ə söyləyib ki, bu çox həssas məsələdir. Ekspertin sözlərinə görə, əməliyyatçıların səlahiyyətlərinin artırılması onların iş keyfiyyətlərinin və hərəkət imkanlarının genişləndirilməsi kimi dəyərləndirilə bilər: "Hazırda regionda vəziyyət mürəkkəbləşir. Hər bir ölkə kimi Azərbaycan da özünün ictimai və dövlət təhlükəsizliyi haqqında tədbirlər görür. Məxsusi olaraq indiki məqamda Azərbaycanda dini ekstremizmin güclənməsi prosesləri gedir. Bunları müşahidə etmək elə də çətin deyil. Siyasi ekstremizmi, ölkəmizə xaricdən olan təhdidlər və Azərbaycan daxilindəki bəzi pozucu qüvvələrin baş qaldırması məsələlərini nəzərə alsaq, bu təklif müsbətdir. Həmçinin, dövlətçiliyimizin möhkəmlənməsinə xidmət göstərən amillərdir. Məsələn, elə operativ tədbirlər olur ki, hansısa bir cinayətkarın izlənməsi, təqibi prosesi gedir. O proses həmin şəxsin ofisinə və yaşadığı məkana qədər aparılır və orada artıq dayanır. Məhkəmənin qərarını gözləmək lazım olur. Məhkəmə qərarı da uzun müddət aparan məsələdir. Bunun üçün xüsusi məhkəmə keçirilməlidir. Məhkəmədə baxış keçirilməlidir. Hakim qərar verməlidir. Bu da xeyli müddət aparır. Yəni əməliyyat tədbirinin keyfiyyəti aşağı düşür. Lazımi an əldən buraxılır. Hətta elə hallar olur ki, qərarın gecikməsi uğursuzluqlara gətirib çıxarır. Bu mənada dövlətçiliyin və ictimai təhlükəsizliyin qorunması baxımından əməliyyatçıların səlahiyyətlərinin çoxaldılması pis olmazdı. Onların imkanlarının artırılması məqsədəuyğun sayıla bilər”.
Bununla yanaşı, ekspert bildirib ki, əməliyyatçılar səlahiyyətlərinin artırılmasından sui-istifadə etməməlidirlər: "Əməliyyatçılar həmin prosesi obyektiv edə biləcəklərmi? Bu hüquq onlara veriləndə gərək həmin əməliyyatçıların üzərinə xeyli məsuliyyət də qoyulsun. Yəni o məhkəmənin rolunu həmin əməliyyata rəhbərlik edən qurum araşdırmalıdır. Bir də görürsən ki, 5 axtarış tədbirindən 1 və ya 2-i lazımlı olur. Qalan 3 axtarışın lazımsız olması üzə çıxır və bu, insanlarda narazılıq yaradır. Bu, bir az mürəkkəb məsələdir. Düzdü, yaxşı tərəfləri də var. Qanunvericilikdə həmin detalların üzərində xeyli dayanmaq lazımdır. Bir qədər zərif, incə məsələdir. Ortaq məxrəc tapılmalıdır. Elə etmək lazımdır ki, keyfiyyətin artması insan hüquqlarının pozulmasına səbəb olmasın”.
Ayyət Əhməd
