"Avropa Birliyinin (Aİ) daxilində də bir sıra ölkələr, erməni diasporu, onların arxasında duranlar Azərbaycana qarşı informasiya müharibəsi aparır”.
Bunu "Sherg.az”a prezidentin İctimai-siyasi məsələlər üzrə köməkçisi - şöbə müdiri Əli Həsənovun "Dağlıq Qarabağ münaqişəsi kimi hələ də həllini tapmamış problemlər Azərbaycanın Aİ ilə yüksək səviyyədə tərəfdaşlıq münasibətlərinin inkişaf etməsinə maneçilik törədir” fikirlərinə münasibət bildirərkən millət vəkili Asim Mollazadə deyib.
Deputat bildirib ki, münaqişənin həll olunmaması əslində bölgədə, sabitliyin, tərəfdaşlığın qarşısını alır:
"Dağlıq Qarabağ münaqişəsi Aİ ilə əlaqələrin inkişafına əsas maneədir. Buna baxmayaraq, Avropadan Ermənistana qarşı sanksiya tələbinin qəbul olunacağını düşünmürəm. Krım və Donetskə görə Rusiyaya qarşı sanksiya varsa, məntiqlə Ermənistana da tətbiq edilməlidir. Azərbaycan ərazilərini işğal etmiş işğalçı dövlətə qarşı ən sərt sanksiyaları qəbul etmək lazımdır”.
Qeyd edək ki, bu gün Belçikanın paytaxtı Brüssel şəhərində "Separatizmin beynəlxalq sülhə və təhlükəsizliyə yaratdığı təhdidlər” mövzusunda beynəlxalq forum keçirilib.
Forumda çıxışı zamanı Ermənistan-Azərbaycan Dağlıq Qarabağ münaqişəsindən danışan Ə. Həsənov bildirib ki, münaqişə ilə bağlı BMT-nin, o cümlədən Aİ-nin müvafiq qətnamələrinin tələblərinə baxmayaq, Ermənistan Azərbaycana qarşı işğalçılıq siyasətini davam etdirir:
"Hesab edirəm ki, Aİ-nin işğalçı dövlətə qarşı sərt mövqedən çıxış etməsi bu qurumla Azərbaycan arasında strateji tərəfdaşlıq əlaqələrini möhkəmləndirən növbəti mühüm faktorlardan biri ola bilər”.
Aysel Aslan
