Neftin qiyməti yenidən artacaq. Səudiyyə Ərəbistanının gələn ay neft hasilatının həcmini azaldacağına dair bəyanatı fonunda dünya bazarında neft bahalaşmağa başlayıb. Bu gün səhər əmtəə birjalarında gələn ilin yanvar ayı fyuçersləri üzrə "Brent” markalı neftin 1 barelinin qiyməti 1,55% artaraq 71,27 ABŞ dollarına, bu ilin dekabr ayı fyuçersləri üzrə WTI markalı neftin 1 barelinin qiyməti isə 0,96%artaraq 60,77 dollara çatıb.
Məsələni şərh edən iqtisadçı-ekspert Fuad İbrahimov "Sherg.az”a bildirib ki, ötən həftə ərzində "Brent” markalı neftin qiyməti oktyabr ayının əvvəllərinə nisbətən əhəmiyyətli dərəcədə aşağı endi:
"Son vaxtlar dünya bazarında "qara qızıl”ın qiyməti həm iqtisadi amillərdən, həm də siyasi faktorlardan aslı olaraq ucuzlaşıb. Lakin bu həftənin ilk günündə neftin qiymətində artım müşahidə olunur. Bu artıma dünya bazarında neftin həcm göstəricilərinin dəyişməsi yol açıb. Lakin gələn aylar ərzində "qara qızıl”ın qiymətinin artacağı proqnozunu vermək çox çətindir. Çünki dünya birjalarında kifayət qədər irihəcmli, sərmayəli iştirakçılar var.
Həmçinin bu kimi faktorlarla yanaşı bir sıra siyasi amillər və ya iqtisadi proseslər də neft bazarlarına əks təsir göstərə bilər. Ona görə də Səudiyyə Ərəbistanının hasilatı azaldacağı məlumatını şübhə altında saxlamaq lazımdır. Məncə, bu sahədə alternativ vəziyyətin yarana biləcəyinə daha çox üstünlük verməliyik”.
Kənan Eynuroğlu
