"Binəqədi rayonu, 6-cı mikrorayon ərazisində, 153 saylı uşaq bağçasının yaxınlığında yaşayan sakinlər həyətlərindəki ağacların kəsilməsindən narazıdır”.
Bu barədə "Sherg.az”a həmin ərazidə yaşayan və adının çəkilməsini istəməyən sakinlərdən biri məlumat verib. Xəbərdə deyilir ki, binaların ətrafındakı ağaclar tamamilə məhv edilib.
Sakinlər bununla bağlı rayon icra hakimiyyətinə və Ekologiya və Təbii Sərvətlər Nazirliyinə (ETSN) şikayət etsələr də, nəticə əldə olunmayıb:
"Həmin qurumlardan bildirildi ki, guya ağaclar çürüdüyü üçün kəsilib. Amma şəkildən də göründüyü kimi, ərazidə çürümüş ağac yoxdur. Üstəlik, aidiyyəti orqanlar həqiqətən çürüdüyü üçün ağacları kəsiblərsə, yeni ağaclar əkə bilərdilər”.
Şikayətçi onu da əlavə edib ki, rəsmi qurumlar ərazidə yaşayan bəzi sakinlərə ağacların yerində bina tikiləcəyini deyib:
"Bu iddianın həqiqət olub-olmadığını dəqiq bilmirik. Amma istənilən halda İH-nin və nazirliyin işçiləri bu barədə danışıb. Sakinlər bina tikilməsi, yaxud başqa səbəbdən ağacların kəsilməsi ilə razılaşmır, narazılıqlarını davam etdirirlər”.
Aysel Aslan
