"Ali məktəbləri bitirən məzunların işlə təmin olunması üçün əmək bazarının tələbatına uğun mütəxəssis hazırlığı həyata keçirilməlidir”.
Bunu "Sherg.az”a ali məktəb məzunlarının iş probleminin həlli ilə bağlı danışarkən tanınmış təhsil eksperti Etibar Əliyev deyib. O bildirib ki, əmək bazarı anlayışı ümumiyyətlə yoxdur:
"Konkret olaraq hansısa şirkətlərdə, istehsalat yerlərində müəyyən vaxt ərzində dəyişikliklər, ixtisarlar baş verir. Yeni işçilər götürmürlər. Bu gün şirkətlər, istehsalat müəssisələri universitetlərdə yüksək nəticə göstərən məzunları izləməlidirlər. Dünyanın inkişaf etmiş ölkələrində sistem bu cür qurulur. Hətta tələbələrin ödənmişini həyata keçirən şirkətlər də var. Bununla tələbələr onların kadrları sayılır. Həmin şirkətlərin təşkilatında, işində bu cür savadlı kadrlar mühüm rol oynayır.
Təəssüf ki, bizdə hələlik belə bir sistem formalaşmayıb. Məsələn, müəllim peşəsini yüksək balla seçənlər üçün vakant yerlər elan olunur. Açıq şəkildə bilik və bacarıqlarını göstərən şəxslər bu peşəni seçə bilirlər. Başqa sahələrdə isə belə deyil. Xüsusilə kənd təsərrüfatı sahəsində vəziyyət acınacaqlıdır. Yəni Kənd Təsərrüfatı Akademiyası kim üçün mütəxəssis hazırlayır, bəlli deyil. Ona görə, bir çox hallarda qeyri-müəyyənlik mövcuddur.
Xeyli sayda ali təhsilli işsiz gənclərə rast gəlirik. Maraqlı fakt deyim. Universitetlərdə "Fizika” və "Fizika müəllimliyi”, "Kimya” və "Kimya müəllimliyi” ixtisasları var. Burada qeyri-rasional ixtisaslaşma həyata keçirilib. Məsələn "Kimya” və "Fizika” ixtisaslarını bitirən şəxs nə elmi-tədqiqat müəssisələrində işləyir, nə də müəllim. Fizik və ya kimyaçı hansısa zavodda, elmi-tədqiqat müəssisəsində işləməlidir. Həmin şəxslərin işsizliyi problemi yaranır. Elmi-tədqiqat müəssisələrində işləmək üçün magistratura pilləsini bitirməlidir. Müəllim işləmək üçünsə, konkret müəllimliyi bitirməlisən. Yüz minlərlə gənc ixtisasların müəyyənləşdirilməsinin əziyyətini çəkirlər. Bu problemi həll etmək lazımdır.
Bütün hallarda indiki postsənaye cəmiyyətinin özünün kadr tələbatları olmalıdır. Şirkətlər maraqlanmalıdır ki, faydalı, bilikli məzunları işə cəlb etsinlər”.
Aysel Aslan
