"Dərmanların resept blankları ilə əlaqədar ayrı-ayrı firmaların, klinikaların öz reseptləri var”.
Bu sözləri "Sherg.az”a "Aptek təşkilatlarına dair tələblər və aptek təşkilatlarından dərman vasitələrinin buraxılması qaydaları”ndan danışarkən tibb elmləri doktoru, professor Adil Qeybulla söyləyib.
O diqqətə çatdırıb ki, bu sahədə vahid forma tətbiq edilməsi vacibdir:
"Çünki dərman vasitələrinin qeydiyyata alınmasında bu formalardan istifadə edilir. İcbari tibbi sığorta hələlik yoxdur, xəstə dərmanı özü aldığına görə, reseptlərin vahid forması önəmli olmur. Dövlət təminatı olarsa, dərmanlar icbari tibbi sığorta tərəfindən insanlara veriləcəyi zaman mütləq vahid resept blankı olmalıdır.
Həmin reseptə düzəlişlər olmaz, çünki statistika dəqiq həyata keçirilməlidir. Dərmanların hər bir avadanlığı, istifadə olunan sərfiyyat materialının konkret hesabı olmalıdır. Bunlar maliyyəyə bağlı məsələlərdir”.
Qeyd edək ki, qaydalara əsasən reseptlər təşkilati-hüquqi və mülkiyyət formasından asılı olmayaraq bütün tibb müəssisələrində çalışan, həmçinin özəl tibbi praktika ilə məşğul olan resept yazmaq hüququna malik tibb işçiləri (həkim və tibb məntəqələrinin feldşerləri) tərəfindən tibbi göstərişlər əsasında yazılır. Dərman vasitələrinə reseptlər "Resept blankı forması” və "Ödənişsiz resept blankı forması”nda, optik ləvazimatlara isə "Optik ləvazimatlara resept blankı forması”nda yazılır.
Resept dərman vasitələrinin beynəlxalq patentləşdirilməmiş adı, buraxılış forması, dozası və istifadə qaydaları qeyd olunmaqla yazılır. Təyin edilmiş dərman vasitəsinin beynəlxalq patentləşdirilməmiş adının olmadığı hallarda (3 və daha artıq tərkibli, bioloji oxşar dərman vasitələri qrupuna aid olduqda) resept blankında onun ticarət adı yazılır. Resept blanklarında hər hansı düzəlişə yol verilmir.
Aysel Aslan
