Bütün dünyada intiharlara səbəb olması ilə gündəmə gələn "Mavi Balina” oyunundan sonra yeni "Momo" adlı, ən azı "Mavi Balina qədər təhlükəli oyun növü yaradılıb.
Cənubi Amerika ölkələrində meydana gələn və "WhatsApp" sosial şəbəkəsi vasitəsilə yayılan "Momo" oyunu "Mavi Balina"nı təkrarlayır. Uşaqların, yeniyetmə və gənclərin diqqətini cəlb etməklə başlayan bu mobil tətbiq, digərlərini aşağılamaq, şəxsi məlumatların ələ keçirilməsi və istifadəçilərin idarə olunması ilə nəticələnir. Oyunun təsisçiləri onların istədiklərini etməyən istifadəçiləri təhdid etməklə onları asılı vəziyyətə salır.
Bir çox ölkədə yayılan bu təhlükəli mobil oyun barədə Türkiyə mətbuatı da valideynlərə xəbərdarlıq edib.
Son zamanlar bu cür təhlükəli oyunların artmasının səbəblərini "Sherg.az”a izah edən İKT sahəsi üzrə ekspert Cahid İsmayıloğlu bildirib ki, belə oyunları hazırlayanlar adətən psixoloji problemləri olan şəxslərdir:
"Müxtəlif psixoloji problemləri olan, insanlara ziyan verməyə çalışan şəxslər bu cür virtual oyunlar təsis etməklə istəklərini həyata keçirirlər. Digər tərəfdən həmin oyunlarda müxtəlif reklam çarxları paylaşmaqla, təhlükəli oyunların yayılmasına nail olub, maliyyə əldə edən şəxslər də var. Hesab edirəm ki, bu tip oyunların yayılmasına qarşı mübarizə aparılmalıdır. Bunun üçün maarifləndirmə həyata keçirmək, valideynləri və bütünlükdə cəmiyyəti məlumatlandırmaq vacibdir. Təhlükəli oyunların ayaq açdığı ölkələrdə daim cəmiyyət xəbərdar edilməlidir.
"Mavi Balina”, "Momo” və bu qəbildən olan oyunlar insanlara, xüsusilə uşaqlara və yeniyetmələrə ziyan vurmaq üçün təsis edilir. Xatırlatmaq istəyərəm ki, "Mavi Balina” oyununun yaradıcısı həbs olunduqda onun ruhi xəstə olduğu aydın oldu. Həmin şəxs insanlara nifrət edir, onları öldürməkdən həzz alırdı. Bu niyyətlərini həyata keçirmək üçün müxtəlif üsullara əl atan insanlar hər gün daha yeni vasitələr yaradırlar”.Aysel Aslan
