ABŞ və Türkiyənin YPG və PYD məsələsində anlaşacağı gözlənilməsə də, tərəflərin qarşıdurması fəal toqquşmaya yol açmayacaq”.
Bunu "Şərq”ə açıqlamasında Sülh və Münaqişələrin Həlli Mərkəzinin rəhbəri Məhəmməd Əsədullazadə deyib. Yaxın Şərqdə cərəyan edən prosesləri və Vaşinqton-Ankara münasibətlərini dəyərləndirən politoloq bildirib ki, Amerika ilə Türkiyə rəsmiləri arasında YPG-nin Menbiç və Fəratın şərqindən geri çəkilməsi, o cümlədən Türkiyə Silahlı Qüvvələrinin əməliyyatı barədə konfidensial danışıqlar aparılır:
"Tramp və Ərdoğanın telefon diplomatiyasından sonra ümumi razılaşma və ortaq xəttin müəyyən olunması üçün xarici işlər nazirləri - Pompeo və Çavuşoğlu arasında danışıqlar davam etdirilir. Vaşinqton danışıqlarda Türkiyənin hərbi əməliyyatdan daşınmasında israr edir. Amma əvəzində Türkiyənin təhlükəsizliyi barədə tutarlı arqument ortaya qoya bilmir. Ağ Ev çalışır ki, Türkiyə Astana formatından çıxarılsın, Rusiya və İranla birgə kordinasiyaya son versin. Əvəzində isə YPG-yə dəstəyini dayandıracağını vurğulayır. Amma Vaşinqton öz siyasətində səmimi olmadığı üçün Ankara Moskva və Tehranla münasibətləri pozacaq mərhələyə gəlməyəcək”.
Analitikə görə, hələlik ABŞ-Türkiyə arasında çox ciddi, gərgin danışıqlar hökm sürür:
"Amerika Ankaranın müstəqil və dönməz siyasətinə qəzəblidir. Ona görə də YPG-dən əl çəkməməklə, terror təşkilatını gücləndirməklə, Türkiyəyə qarşı kart olaraq istifadə etməyi planlayır”.
İsmayıl
