Yol –nəqliyyat hadisələrinin sayı durmadan artır. Statistik göstəricilərdən də məlum olur ki, nəqliyyat hadisələri zamanı ölüm halları olduqca çoxdur.
Növbəti yol nəqliyyat hadisəsi Salyanda baş verib. Məktəbliləri idman yarışına aparan mikroavtobus faciəvi şəkildə qəzaya uğrayıb. Dəhşətli hadisə nəticəsində yeddi şagird və bir məşqçi-müəllim yaralanıb. 11 yaşlı İlkin Əhmədov isə dünyasını dəyişib.
Hər gün baş verən qəzalar yol terrorundan xəbər verir. Bir çox hallarda sürücü məsuliyyətsizliyi, yaxud da yol infrasturuktutunun əlverişli olmaması faciəvi sonluqlarla nəticələnir. Görəsən, bu problemin azalması üçün hansı təbdirlər görülməlidir?
Sualımızı cavablandıran "Digesta” hüquq firmasının direktoru, nəqliyyat məsələləri üzrə ekspert Ərşad Hüseynov "Sherg.az”a bildirib ki, poblemlərin həlli üçün yol hadisəsinə olan yanaşmalar kökündən dəyişməlidir.
Ekspert qeyd edib ki, 2018-ci ilin dekabr ayında yol hərəkəti üzrə dövlət proqramı qəbul olundu və həmin proqramını olduğu kimi icra etmək lazımdır:
"Baş verən yol nəqliyyat hadisələrini ortaya qoymaq və daha sonra bu qəzaların həlli istiqamətində konkret tədbirlər görmək lazımdır. Bunun üçün də dövlət orqanları müəyyən olunub.Yalnız sürücülər deyil, yol hərəkəti iştirakçılarının hər biri məsuliyyətli olmalıdır. Məsələn, qəzalarda sürücü günahkardırsa, deməli, sürücülərin hazırlığı işi zəifdir.
Yaxud da qəzalara səbəb yol infrasturukturudursa, onda yollara nəzarət gücləndirilməlidir. Ümumilikdə sürücülərin, piyadaların maarifləndirilməsi lazımdır. Bunlarda müəyyən problemlər var. Problemləri də aradan qaldırmaq üçün proqram çərçivəsində geniş şəkildə işlər görülməlidir”.
Yeganə Bayramova
