Alimlər Marsı yaşama uyğun planetə çevirmək üçün yeni planlar hazırlayır.
Sherg.az xəbər verir ki, bu plan, yaxın dövrdə mikroskopik həyatın yaranmasını, uzaq gələcəkdə isə insan şəhərlərinin salınmasını nəzərdə tutur.
"Nature Astronomy" jurnalında yayımlanan araşdırmada, alimlər Marsı “həyat dostu” etmək üçün geo-mühəndislik üsullarının tətbiqini təklif edirlər. Pioneer Labs şirkətinin baş direktoru Erica DeBenectintis, yeni texnologiyalar – xüsusən SpaceX-in Starship kosmik gəmisi və süni biotexnologiyalar – sayəsində bu planın artıq mümkün olduğunu bildirib.
Çikaqo Universitetindən Edwin Kite Marsda sabit su, nəfəs almağa yararlı oksigen və davamlı ekosistem yaratmağın uzunmüddətli hədəf olduğunu, qısamüddətli mərhələdə isə sadəcə mikrobik həyatın mümkün olacağını deyib.
Harvard Universitetindən Robin Wordsworth isə Marsı yaşıl planetə çevirməyin insan kolonizasiyasından daha irəli gedərək, həyatın yayılmasına töhfə verəcəyini vurğulayıb: “İnsanlığı biosferin bir hissəsi hesab edirəm, ondan ayrı deyil. Həyatı qoruyub digər planetlərə yaymaq insanlığın vəzifəsidir.”
Los Alamos Milli Laboratoriyasından Nina Lanza isə Marsın həm də iqlim problemlərimizin həlli üçün mühüm sınaq sahəsi ola biləcəyini deyib. DeBenectintis əlavə edib ki, Marsda yaşıl texnologiyalar üçün mövcud infrastruktur və status-kvo olmadığından, bu texnologiyaları inkişaf etdirib Yer üçün də uyğunlaşdırmaq asan ola bilər.
