Çay və qəhvə daim müqayisə edilən iki içkidir. Planetimizdə yaşayan insanları çay və qəhvə həvəskarlarına bölmək olar. Səbəb də odur ki, hər iki içkinin yaxşı dadı var və onların tərkibindəki kofein beynimizlə orqanizmimizə tonus verir.
Həmçinin, çay və qəhvə arasında bu rəqabətə son zamanlar sağlamlıq faktorları da əlavə edilib. Hər ikisinin ürək-damar üçün faydalı olduğu deyilir, lakin insanlar hansına ehtiyacı olduğuna görə seçim edir.
Maraqlıdır, hansı içki sağlamlıq baxımından daha yaxşı və faydalıdır? Çay yoxsa qəhvə?
Mövzu ilə bağlı danışan dietoloq Leyla Zülfüqarova "Sherg.az"a söyləyib ki, biz xalq olaraq mayeni çox içməyə meyilliyik:
''Təəssüflər olsun ki, isti də belə qara çay içirik. Təsadüfi deyil ki, xroniki xəstəliklərin çoxalmasına səbəb də məhz, budur. Çünki qara çay içərək toksinləri bədəndən atmırıq. Əksinə, toksinlərin bədəndə qalmasına şərait yaradırıq. Ona görə ki, qara çayın tərkibində tanen maddəsi var. Bu da dəmiri azaldır. Ona görə də daha çox yemək istəyirik. Fikrimcə, ən məsləhətli içki növü bitki çayıdır. Ancaq qəhvə ilə çayı müqayisə etdik də əlbəttə, kofe daha məqsədəuyğundur. Təbii ki, qəhvənin qəbulu zamanı dozanı aşmaq olmaz. Beləki, gün ərzində 2 fincan qəhvə içmək olar. Qəhvə məlum faydaları ilə yanaşı, asılılıq yaradan və müəyyən zərərləri də var. Qəhvənin həddindən artıq istehlakı ürək ritminə zərərli təsir göstərir və qan təzyiqinin artmasına səbəb olur''.
