Qüdrət Həsənquliyev: “Bir çox nazirliklərdə işçilər səhər işə kompüter oyunları ilə oynamağa gəlirlər”
“Dövlət strukturlarında çalışanların ixtisarına bizdə də ehtiyac var”
“Dövlət qulluqçularının əməkhaqlarının aşağı olması ilə bağlı insanlarda fikir var”. Bunu Milli Məclisin Hüquq siyasəti və dövlət quruculuğu komitəsi sədrinin müavini Qüdrət Həsənquliyev deyib. Deputat bildirib ki, ştatlar həddindən artıq şişirdilib: “Təkcə dövlət qulluğunda deyil, dövlət müəssisələrində ştat şişirdilir və həmin qurumlar rentabelli işləmirlər. Bir çox nazirliklərdə işçilər səhər işə kompüter oyunları ilə oynamağa gəlirlər. Yeni dövlət strukturları yaradılanda Prezidentin sərəncamında ştat vahidi göstərilir. Amma minimal hədlər qoyulmalıdır və qurum fəaliyyətə başlayandan sonra ştatın azaldılıb, artırılmasına baxılmalıdır. Dövlət Neft Fondunda 11-12 müşavir, elə o qədər müavin niyə olmalıdır? Buna bir məhdudiyyət qoyulmalıdır. Bura ayrılan vəsaitin polisin, prokurorun və ya digərlərinin maaşının artırılmasına yönəltmək olar".
Parlament üzvü vurğulayıb ki, bu məsələni Dövlət Qulluğunun İdarəetmə Şurası ilə məsləhətləşmək lazımdır: "Şavkat Mirziyoyevin sərəncamı ilə Özbəkistanın 35 faiz dövlət strukturlarında çalışanların ixtisarı nəzərdə tutulur. Bizdə də buna ehtiyac var. Say azaldılmalı, keyfiyyət və əməkhaqları artırılmalıdır. 3 nəfərdən ibarət yeni sektor yaratmağın nə mənası var ki?! Bir nümunə çəkmək istəyirəm. Naxçıvanda KİV-ə Dövlət Dəstəyi Fondu yaradılıb və Naxçıvanda cəmi bir "Şərq qapısı" qəzeti fəaliyyət göstərir. İndi məlum olub ki, bu Fondun işçilərinin sayı “Şərq qapısı” qəzetinin işçilərinin sayından çoxdur. Yəni aparatın şişməsi deyəndə bunu nəzərdə tuturam”. Komitə sədri Əli Hüseynli də optimallaşmanın tərəfdarı olduğunu qeyd edib.
