Ona görə bazarlarda Pakistan kartofları meydan sulayır
“Dəfələrlə qeyd etmişik ki, məhsulun qıt olmamağı üçün soyuducu anbarların sayını artırmaq lazımdır”
Paytaxtda əhali kartof və soğanın qiymətinin baha olmasından narazıdır.
Hazırda bazarlarda kartofun 1 kiloqramı təxminən 1,50-3 manata, soğanın 1 kiloqramı isə 1,30-1,70 manata satılır.
Bəs qiymətinin baha olması nə ilə əlaqədardır?
İqtisadçı-ekspert Rauf Qarayev “Şərq”ə açıqlamasında yeni məhsullar bazara çıxanda kartof-soğanın ucuzlaşacağını deyib: “Hazırda piştaxtalarda ölkəyə Pakistandan idxal olunan kartof üstünlük təşkil edir. Əvvəllər isə Azərbaycana kartof, əsasən, Belarusdan, Rusiyadan, Ukraynadan gəlirdi. İndi heç İran kartoflarını da bazarda görmürük. Tələbatı Pakistan kartoflarının hesabına ödəyirlər. Məsafə baxımdan isə ora uzaqdır, amma itirilmiş bir bazarı digəri ilə əvəz etməyə məcburuq. Bu da qiymət artımına təsir edir.
Eyni zamanda dünyada gedən bahalaşma prosesi təbii olaraq kənd təsərrüfatı məhsullarının qiymətinə təsir edir. Həm də ki, ölkəmizdə əkilən məhsullar, əsasən, Rusiya bazarlarına gedir və daxili tələbatı ödəmək üçün Pakistandan kartof almalı oluruq. Yəni görünən odur ki, əkilən məhsul daxili tələbatı tam ödəmir və məhsulun qiyməti artmağa başlayır. Dəfələrlə qeyd etmişik ki, məhsulun qıt olmamağı üçün soyuducu anbarların sayını artırmaq lazımdır. Amma ölkəmizdə anbarlar az olduğundan ora qoyulan məhsullar da bazara çıxarıldıqda qiymətə təsir etmir. Yəni anbarların az olması qiymətin yüksək olmasına gətirib çıxarır. Digər amil isə anbarlarda texniki dəstək qiymətinin də yüksək olmasıdır. Azərbaycan kənd təsərrüfatı dərmanlarını da xaricdən alır və bu da qiymət artımına təsir edən amillərdəndir”.
Soğanın niyə bahalaşmasına gəldikdə isə R.Qarayev deyib ki, bu da kənd təsərrüfatında düzgün proqnozlaşmanın olmamasından irəli gəlir:
“Sahibkarın xarici bazara çıxışının məhdudlaşması, soğan saxlamaq şəraitinin məhdud olması səbəblərindən kəndli soğanı az əkir. Buna rəğmən may ayında soğanın da qiymətinin aşağı düşəcəyini güman edirəm. Bazara təzə kartof, soğan çıxanda, təbii ki, qiymətlərdə də enmə olacaq".
