Ermənistan tərəfinin atəşə tutması nəticəsində Azərbaycanın Gəncə şəhərindəki hava limanına ziyan dəyməyib.
Oxu.az bildirir ki, bu barədə aeroportun direktoru Bəylər Nəcəfov jurnalistlərə açıqlamasında deyib.
"Səhər yeddidən bəri işdəyəm, burada atışma olmayıb", - deyə o qeyd edib.
B.Nəcəfov, şəhərdən atəş səslərinin gəldiyini, ancaq bu hücumların hava limanının ərazisinə təsir etmədiyini vurğulayıb.
Onun sözlərinə görə, hava limanı mart ayından bəri koronavirus səbəbindən müntəzəm uçuşları dayandırıb.
O həmçinin, aeroport ərazisində hərbi təyyarənin olmadığını qeyd edib.
Xəbər verdiyimiz kimi, işğalçı Ermənistan silahlı qüvvələri bu gün Azərbaycanın ikinci böyük şəhəri olan Gəncənin mülki əhalisinin sıx yaşadığı məntəqələri ağır artilleriyadan atəşə tutub.
