“İnformasiya təminatının həyata keçirilməsi təsadüfi adamlara, bloqerlərə yox, ixtisaslaşmış kadrlara həvalə edilməlidir”
“İndi meydan döyüşləri ilə yanaşı, psixoloji savaşlar da gedir. Əslində böyük müharibələrin taleyini həll edən də elə psixoloji məqamlardır”
Ermənistan başlatdığı təxribatı uğurla başa çatdırmaq naminə ən müxtəlif vasitələrdən istifadə edir. Düşmən təkcə avtomatla, qumbara ilə yox, həm də multimedia alətləri ilə mübarizə aparır. Yayılan səs yazıları, montaj edilmiş görüntülər də bunu sübut edir. Ermənistan Müdafiə Nazirliyi dezinformasiyalar yaymaqla məşğuldur. Deməli, diqqətli olmalı, necə deyərlər, hər xəbərin üstünə qaçmamalıyıq. Əks halda ictimai şüurda ciddi dəyişikliklər ola bilər.
Düşmənin çirkin təxribatları baradə “Ağ partiya”nın sədri Tural Abbaslı “Sherg.az”a danışıb. Onun fikrincə, bütün həmlələrə hazırlıqlı olmalıyıq:
“İndi meydan döyüşləri ilə yanaşı, psixoloji savaşlar da gedir. Əslində böyük müharibələrin taleyini həll edən də elə psixoloji məqamlardır. Hətta deyərdim ki, yaşadığımız XXI əsrdə informasiya zərbələri odlu silahdan daha təhlükəlidir. Çünki demorilizə olunmuş əsgər texnika ilə nə qədər təmin olunsa da, məğlubiyyətə məhkumdur. Dünyanın ən nəhəng dövlətlərindən biri olan Amerikanın Vyetnamla müharibə apara bilməməsi, ya da Əfqanıstanla hesablaşması heç də təsadüfi deyil. Bu, qarşı tərəfin əhval-ruhiyyəsi sayəsində mümkün oldu. Qələbə, mübarizlik ovqatı isə təbliğatla, piarla formalaşır”.
T.Abbaslının sözlərinə görə, təbliğatın ən vacib elementlərindən biri də qəhrəmanlarımızı vaxtında tanıtmaqdır:
“Mübariz İbrahimov, yaxud Polad Həşimov şəhid olanadək onları kim tanıyırdı? Heç kim. Hərçənd ki, həmin adamları və onlar kimi başqalarını qəhrəman edən əllərindəki avtomat yox, əqidələri idi. Biz belə hərbçilərimizi sağ ikən tanıtmalı, gənc nəslə nümunə göstərməliyik. Şair Cabir Novruz demiş: “Sağlığında qiymət verək insanlar a” Yalan deməyək, lakin həqiqəti vaxtında, gecikmədən təqdim edək”.
Partiya sədri, həmçinin qeyd edib ki, müasir müharibənin tələblərinə cavab verməkdən ötrü ciddi işlər görülməlidir:
“İnformasiya təminatının həyata keçirilməsi təsadüfi adamlara, bloqerlərə yox, ixtisaslaşmış kadrlara həvalə edilməlidir. Bunun üçün isə hökumət İKT-nin imkanlarını qiymətləndirməlidir. ABŞ prezidenti Donald Trampa qarşı cinayət işinin açılmasının səbəbi onun Rusiyanın informasiya siyasəti ilə hakimiyyətə gətirilməsi iddiasıdır. Baxın, informasiyanın gücü budur. Odur ki, bu məsələ hansısa qurumların, ya da partiyaların görəcəyi iş deyil. Xüsusi dövlət proqramı qəbul edilməlidir. Ayrı-ayrı güc strukturlarının tərkibində informasiya ilə işləyən şöbələr yaradılmalıdır. İnformasiya təminatı dövlət təhlükəsizlik konsepsiyanın tərkib hissəsi, özü də ən vacib bəndi olmalıdır.
Biz zamanı qabaqlamalı, texnologiyanın dünya miqyasındakı əhəmiyyəini qiymətləndirməliyik. Əgər bu gün dolma bişirən qadın bir dəqiqəlik “Tik-tok” çəkib, paylaşırsa və onun 5-6 min izləyicisi olursa, deməli, bizə verilən multimedia imkanları insanların şüuruna təsir edə bilən ən güclü silahdır”.
