“Nəticə etibarı ilə bu da öz işini görür”
“Gedin sinif otaqlarına baxın, müəllimlərin hamısı maskasız dərs keçirlər”
Dünyanı cənginə alan Koronavirus pandemiyası milyonlarla insanın yoluxmasına səbəb olur. Digər ölkələrdə olduğu kimi Azərbaycanda da təhlükəsizlik qaydaları ilə bağlı tədbirlər görülüb. Hətta bu tədbirlər nəticəsində yoluxma sayı xeyli azalıb.
Sentyabr ayının 27-dən Dağlıq Qarabağda başlayan müharibə ilə əlaqədar olaraq insanlar pandemiyanı arxa plana keçirdi və təhlükəsizlik qaydalarına əməl etmədi. İşğaldan azad olunmuş torpaqlarımızın sevincini yaşamaq üçün insanlar küçələrə axın etdilər. Nəticə etibarı ilə yoluxma sayı yenidən artmağa başladı. Məsələn elə bu gün ölkəmizdə koronavirus (COVID-19) infeksiyasına 369 yeni yoluxma faktı qeydə alınıb, 102 nəfər müalicə olunaraq sağalıb və evə buraxılıb, 4 nəfər vəfat edib. Eyni zamanda məktəblərin açılması ilə orta məktəblərdə də koronavirusa yoluxma halları qeydə alınıb. Hətta dünən koronavirus təhlükəsinə görə, 10 məktəb distant formata keçib. Artıq bəzi dünya ölkələrində COVİD-19-un ikinci dalğası müşahidə olunur və məhz buna görə də Almaniya, Fransa, Böyük Britaniya və başqa ölkələr yenidən “qapanırlar”.
Maraqlıdır, Azərbaycanda da koronavirusun 2-ci dalğası başlaya bilərmi və bu dalğadan daha az itki ilə çıxmaq üçün nə kimi addımlar atılmalıdır?
Sualmızı cavablandıran Tibb elmləri doktoru, professor Adil Qeybulla “Sherg.az”a bildirib ki, orta məktəblərdə pandemiya ilə bağlı təhlükəsizlik qaydalarına riayət edilmir:
“Virusun bu qədər mutasiyaya, dəyişikliyə uğramasına rəğmən Azərbaycanda hələ də pandemiyanın birinci dalğası hökm sürür. Ümumiyyətlə, Azərbaycan pandemiyanı özünəməxsus şəkildə keçirir.
O da insanların vəziyyəti iqnor etməsi, vətəndaş məsuliyyətsizliyi, qapalı mühitdə karantin qaydalarına riayət etməməsi ilə bağlıdır.
Bu, ordu ilə bağlı məsələlərdə də, məktəblərdə də belədir.
Yəni karantin davranışının nə sevincə, nə də hansısa hisslərə dəxli var. Bu, məsuliyyət hissidir. Artıq sözügedən məsələ ilə bağlı televiziya kanallarında maarifləndirmə getmir.
Nəticə etibarı ilə bu da öz işini görür. Niyə orta məktəblərdə yoluxanların sayı artır? Gedin sinif otaqlarına baxın, müəllimlərin hamısı maskasız dərs keçirlər. Mövcud vəziyyət də yoluxma potensialını qat-qat artırır”.
Pərvin Piriyev
