“Halbuki Fransada baş verənlərin ondabiri Azərbaycanda olsaydı çoxdan hay-küy salmışdılar”
“Yəni bu ölkə başqasına dərs keçmək əvəzinə, özü dərs götürsün”
Fransanın paytaxtı Paris şəhərində növbəti etiraz aksiyası keçirilir. Bu barədə “RİA Novosti” məlumat yayıb. Etirazçılarla polislər arasında gərginlik yaşandığı bildirilir.
Bir qrup etirazçı polisi daşa tutub. Polis onlara qarşı gözyaşardıcı qazdan istifadə edib. Dünyaya demokratiya dərsi keçməyə çalışan Fransa bir özünə baxmırmı? Başqalarını “gözüm çıxdıya” salmaqla deyil axı…
Millət vəkili Məlahət İbrahimqızı “Sherg.az”a açıqlamasında deyib ki, rəsmi Paris bütün beynəlxalq hüquqları pozur:
“Fransanın bütün fəaliyyəti demokratik prinsiplərə, insan hüquqlarına ziddir. Bu hadisələr yeni deyil. Bir ildən çoxdur ki, Fransa şəhərlərində, o cümlədən paytaxt Parisdə aksiyalar davam edir. Əvvəl ancaq “sarı jiletli”lər mitinqlər keçirirdilər. Sonradan isə kütləvi nümayişlər ümummilli səciyyə daşıdı. Fransa “öz gözündə tiri görmür, başqasının gözündə tük axtarır”.
Əlbəttə, hamısı öz işləridir. Necə deyərlər, öz əlləri, öz başları…Amma qəribəsi və təəssüfləndiricisi beynəlxalq təşkilatların səssiz qalmasıdır. Halbuki Fransada baş verənlərin ondabiri Azərbaycanda olsaydı çoxdan hay-küy salmışdılar. Yəni Fransa başqasına dərs keçmək əvəzinə, özü dərs götürsün”.
M.İbrahimqızı, həmçinin Fransanın beynəlxalq hüququ görməzdən gəlməsinə dair daha bir fakt göstərib:
“Sosialistlər partiyasının bir neçə üzvü Xankəndiyə səfər edib, Araik Arutunyunla görüşüblər. Yəni bizdən icazə almadan bizim torpaqlarımıza gəliblər. Niyə? Çünki Fransa hər zaman olduğu km, indi də açıq-aydın ermənipərəst mövqe tutur, separatizmi dəstəkləyir. Bir müddət əvvəl italiyalı siyasətçilər də Qarabağa getmişdilər. Amma əvvəl bizə deyib, razılığımızı almışdılar. Əlbəttə, Azərbaycanın əcnəbi qonaqlara qapısı açıqdır. Fəqət dediyim kimi, icazə alınmalı idi”.
