Uşaqların orqanizmi bu xəstəliyə daha həssas olur
Başqırdıstanın Serafimova qəsəbəsində insanlar arasında bu vaxta qədər rast gəlinməyən siçan qızdırması aşkarlanıb.
Noyabrın əvvəlindən arasında uşağın da olduğu 14 nəfərə ilkin diaqnoz qoyulub.
Böyrək sindromlu hemorragik qızdırma alovlanması artıq 31 nəfərdə aşkarlanıb.
Hazırda epidemioloji araşdırma aparılır, Başqırdıstan hökuməti tərəfindən epidemiya əleyhinə tədbirlər görülür, məktəblər, təhsil müəssisələrində nəzarət gücləndirilib. Yoluxanlar ailəlikcə təcrid olunub. Xəstəlik kəskin virus mənşəlidir, böyrəkləri zədələyir və qanaxma meyillidir. İnkubasiya dövrü 45 günə kimi çəkə bilir. İlk əlamətləri kəskin qızdırma, ürəkbulanma, qusma, titrətmə, yuxu pozulması, tormozlanmadır. Ölüm faizi yüksəkdir.
İnfeksionist Lətifə Allahverdiyevanın sözlərinə görə, siçan qızdırması təbiətdə viral olan zoonotik bir xəstəlikdir. İnfeksiya bədənin ümumi intoksikasiyasına, sidik sisteminin zədələnməsinə və hemorajik sindroma səbəb olur: “Siçan qızdırmasının başlanmasının günahkarı yüksək virulentlik ilə xarakterizə olunan "Bunyavirales" ailəsinin RNT viruslarıdır. Ailənin ən yaygın üzvü Hantaan virusudur. Böyrək sindromlu siçan qızdırması mərhələlərlə inkişaf edir. Yetkinlərdə siçan atəşinin əlamətləri və simptomları xəstəliyin mərhələsi ilə müəyyən edilir.
Siçan qızdırmasının digər patologiyalara oxşar simptomları var ki, onlara (bağırsaq infeksiyası, kəskin tənəffüs yoluxucu xəstəliklər) diaqnoz qoyulmasını çətinləşdirir və bu səbəbdən xəstəlik çox təhlükəlidir. Doğru diaqnoz və müalicə vaxtında qoyulmazsa, böyük bir komplikasiya riski var.
Uşaqlarda siçan atəşi əlamətlərinə xüsusi diqqət yetirilməlidir. Uşağın bədəni infeksiyanın törədicisinə daha həssasdır, buna görə inkubasiya dövrü daha sürətlə davam edir və ikinci və üçüncü dövrlərə uyğun gələn xəstəliyin əlamətləri daha sıx və parlaq olur. Yüksək temperatur tez-tez burun qanamasına səbəb olur. Uşaqlarda siçan atəşinə tutulma ehtimalı az olsa da, nəzarət mütləqdir”.
