Mart ayı ərzində Kliniki Tibbi Mərkəzin (KTM) Toksikologiya şöbəsinə zəhərlənmə səbəbi ilə 104 nəfər qəbul edilib.
Bu barədə KTM məlumat yayıb.
Bildirilib ki, 48 nəfər dərmandan, 23 nəfər sirkə turşusundan, 4 nəfər spirtli içkidən, 2 nəfər qidadan, 14 nəfər dəm qazından, 6 nəfər fosfor üzvi birləşmələr zəhərlənmə ilə, 5 nəfər allergik reaksiya, 1 nəfər anafilaktik şok, 1 nəfər ilan sancması səbəbi ilə şöbəyə yerləşdirilib.
Həkimlərin səylərinə baxmayaraq, zəhərlənən şəxslərdən 5 nəfərin (4 kişi cinsli, 1 qadın cinsli) ölüm faktı qeydə alınıb.
Ölüm səbəbləri sirkə turşusu, allergik reaksiya, dəm qazı və spirtli içki zəhərlənmələri kimi qeyd olunur.
Kliniki Tibbi Mərkəzin Toksikologiya şöbəsinin həkim-toksikoloqu Aynur Məmmədova "Sherg.az"a bildirib ki, ehtiyatsızlığa görə zəhərlənmələr daha çox baş verir:
“Sirkə və yandırıcı turşulardan zəhərlənmə zamanı ilkin tibbi yardım olaraq sulu yağdan istifadə etmək lazımdır. Sulu yağlardan mütləq xəstəyə üç dörd xörək qaşığı verilməsi məsləhətdir. Özbaşına mədə yumaq və ya hər hansı bir tədbir görmək qəti qadağandır. Bu, xəstənin vəziyyətinin ağırlaşmasına gətirib çıxara bilər. Dərman zəhərlənməsi zamanı isə xəstə huşunu itirməyibsə, onda hər 10 kiloya aktivləşmiş kömür əzərək bir stəkan su ilə içirmək lazımdır. Lakin xəstəni xəstəxanaya gətirmək mütləqdir. Çünki zəhərlənmənin dərəcəsindən asılı olmayaraq bəzi dərmanlar xəstəni öldürə bilər”.
