Türkiyənin xarici işlər naziri Hakan Fidan dünən Parisdə Fransa xarici işlər naziri Jan Noel Barrot ilə görüşüb.
APA-nın Fransa Xarici İşlər Nazirliyinə istinadən verdiyi məlumata görə, görüşdə ikitərəfli münasibətlər və regional məsələlər müzakirə olunub. Nazirlər eyni zamanda, Ermənistan və Azərbaycan arasında münasibətlərin normallaşmasının əhəmiyyətini vurğulayıblar:
“Ermənistan və Azərbaycan arasında münasibətlərin normallaşması Cənubi Qafqazın iki dövlətin ərazi bütövlüyü və suverenliyinə hörmət etməklə sülh, inteqrasiya və əməkdaşlıq məkanına çevrilməsinə imkan verməlidir”.
Siyasi şərhçi Azər Həsrət “Sherg.az”a vurğulayıb ki, belə görüşlərin özünəməxsus müəyyən gizliliyi mövcuddur:
“Ona görə də hər iki tərəf gizliliyi qorumağa borcludur. O cümlədən də, qardaş Türkiyənin və Fransanın xarici işlər nazirlərinin görüşündə cəmiyyətə açıqlanmayan müzakirələr aparılıb. Konkret olaraq söhbət Cənubi Qafqazdan və Azərbaycan-Ermənistan arasındakı normallaşmadan gedirsə, Türkiyənin mövqeyi qətiyyətlidir və rəsmi Bakının maraqlarıyla üst-üstə düşür. Hətta Azərbaycanın olmadığ yerlərdə belə Türkiyə həmin maraqları öz mövqeyləri səviyyəsində qoruyur. Türkiyə xarici işlər nazirinin fransalı həmkarıyla sözügedən mövzuda müzakirəsi hər kəsə uyğun şəkildə aparılıb. Yəni Türkiyə, əlbəttə ki, Azərbaycanın ərazi bütövlüyü, Ermənistanın qardaş ölkə və bizə qarşı torpaq iddialarının aradan qaldırılması, ATƏT-in Minsk qrupunun ləğv olunması ilə bağlı müzakirələr gedib. Əminliklə deyə bilərik ki, Türkiyə hər zaman Azərbaycanın mövqeyindən çıxış edir. Azərbaycan və Türkiyə biri-birinə o qədər yaxın dövlətlərdir ki, burada sən mən söhbəti ola bilməz. Türkiyənin xarici işlər nazirinin fransalı həmkarı ilə Cənubi Qafqazı müzakirə etməsinin də dərin mənası var. Çünki Fransa açıq şəkildə Ermənistanın tərəfindən çıxış edir və Türkiyənin qətiyyəti qarşısında mütləq geri çəkilməlidir”.
