Gürcüstanın keçmiş prezidenti Mixail Saakaşvili bazar ertəsi Milli Hərəkatın əsaslı islahatına dair öz planını təqdim edəcəyini bildirib.
Bu barədə o, sosial şəbəkə hesabında qeyd edib.
Saakaşvilinin sözlərinə görə, rejim təkcə milli ləyaqətə deyil, həm də ictimai hərəkatlara, siyasi partiyalara hücum edir.
O bildirib ki, rejim Rusiyanın tapşırıqlarını sədaqətlə yerinə yetirməsi üçün əlindən gələn hər şeyi edir. Saakaşvili daha güclü müqavimətə keçəcəklərini açıqlayıb.
Politoloq Turab Rzayev "Sherg.az"a deyib ki, Mixail Saakaşvili müxalifətin ən əsas təsiredici fiqurlarından biri olaraq qalsa da, artıq yetkin nəzarəti itirməkdədir:
"Onun həbsdə olması partiya üzərində nəzarətinin xeyli azalmasına səbəb olur. Digər tərəfdən Gürcüstanda müxalifət özü də parçalanıb və fərqli liderlər ortaya çıxmağa çalışır. Həmçinin müxalifətdə namizəd kimi Saakaşvilinin partiyasında onun sözlərinə nə qədər əməl edilməsi, dediklərinin icrası sual altındadır. Bəzi hallarda Saakaşvilinin ölkədə olmamasından və ya həbsindən istifadə edərək fərqli qərarlar verirlər. Bütün bunlarla yanaşı hakimiyyət müxalifətdəki bu parçalanmadan, eyni zamanda Qərbdən iqtidara qarşı olan təzyiqdən özünü qorumağa çalışır. Hökumət anlayır ki, müxalifət artıq parçalanıb, istəsə də bir yerə də gəlib hakimiyyətə müdaxilə edə bilməyəcək. Eyni zamanda ABŞ Bayden administrasiyası dövründə Gürcüstana sanksiyalar tətbiq edirdi. Lakin Donald Tramp və onun komandası dönəmində bu məsələlərə maraq azalıb. Buna görə də Gürcüstanda müxalifət istədiyi dəstəyi almaya bilər".
Politoloqun sözlərinə görə, müxalifətin gələcəyi bir yandan onun daxildə birləşib mübarizə aparmasından, digər yandan Avropa İttifaqı və ABŞ-dan iqtidara qarşı olan təzyiqlərdən asılıdır.
