Rusiya Azərbaycan-Ermənistan sərhədindəki vəziyyəti izləyir. Bunu Rusiya Xarici İşlər Nazirliyinin rəsmi nümayəndəsi Mariya Zaxarova bu gün keçirdiyi brifinqdə bildirib. O, Bakı və İrəvanı təmkinli olmağa, deeskalasiya ilə bağlı addımlar atmağa, gərginliyə gətirib çıxaracaq hər hansı fəaliyyətdən qaçmağa çağırıb: “Bütün zəruri məsələlər yalnız sülh, siyasi və diplomatik yollarla həll edilməlidir”. Zaxarova vurğulayıb ki, Rusiya Federasiyası sülh müqaviləsinin imzalanması üçün qalan ziddiyyətlərin aradan qaldırılmasında, habelə Rusiya, Ermənistan və Azərbaycan liderləri arasında üçtərəfli razılaşmalara uyğun olaraq nəqliyyat kommunikasiyalarının açılmasında, sərhədlərin delimitasiyasında və humanitar məsələlərin həllində tərəfdaşlarına kömək etməyə hazırdır.
Politoloq Kazım Kazımov “Sherg.az”a vurğulayıb ki, bu gün həm Moskva və Brüsselin həm də, Vaşinqton və digər ölkələrin Ermənistan-Azərbaycan sərhəd delimitasiya, sülh müqaviləsinin imzalanmasıyla bağlı müəyyən maraqları var:
“Həmin maraqların əsas səbəbi 30 il həll edilməyən konfliktin 2020-ci ildə Azərbaycan tərəfindən yekunlaşmasıyla bağlıdır. Sadəcə olaraq Ermənistan tərəfindən qaynaqlanan texniki və siyasi problemlər mövcuddur. Ermənistan bilərək Azərbaycanın torpaq bütünlüyünü tanımağa çalışmır. Buna görə də sülh müqaviləsinin imzalanması yubanır. Əgər hansısa ölkənin vasitəçiliyi ilə sülh müqaviləsi imzalansa, bu həmin ölkə üçün böyük prestij deməkdir. Müxtəlif ölkələrdən gələn bu kimi açıqlamaların əsas səbəbi budur. Hesab edirəm ki, bu çıxış “Sülh müqaviləsinin imzalanmasında Moskvanın rolu var” ifadəsinin vurğulanması üçün atılan addımdır. Sülh müqaviləsinin nə vaxt imzalanması İrəvam və Bakının verəcəyi qərardır. Azərbaycan bütün təkliflərə açıqdır. Lakin Ermənistan hələ də Azərbaycanın xoş niyyətinə açıq şəkildə cavab verməyib”.
