Avropa Komissiyasının (AK) Prezidenti Ursula von der Leyen Avropa İttifaqı-Mərkəzi Asiya Sammitində Transxəzər Beynəlxalq Nəqliyyat Dəhlizinin geosiyasi və iqtisadi əhəmiyyətindən danışıb.
Ursula von der Leyen bu dəhlizin Avropa ilə 5 Mərkəzi Asiya ölkəsi arasında əlaqələrin möhkəmlənməsində mühüm rol oynayacağını bildirib.
“Getdikcə parçalanan dünyada Transxəzər Nəqliyyat Dəhlizi sizin ölkələrinizlə (Mərkəzi Asiyadakı 5 dövlət) Avropa arasında əlaqələri gücləndirəcək. Ancaq infrastruktur hər şey deyil”, – Ursula von der Leyen qeyd edib.
O, eyni zamanda, bu dəhlizin effektivliyi üçün region ölkələri arasında sərhəd keçidlərinin asanlaşdırılmasının vacibliyini vurğulayıb: “Həm Mərkəzi Asiya, həm də Cənubi Qafqaz ölkələri ilə sərhəd keçidi Qara dənizə çatmaq üçün vacibdir”.
Avropa Komissiyasının Prezidenti Ermənistan-Türkiyə sərhədinin açılması məsələsinə də toxunub. Onun sözlərinə görə, 30 ildən sonra Ermənistanın Türkiyə və Azərbaycanla sərhədlərinin açılması vəziyyəti köklü şəkildə dəyişə bilər: “Bu, oyunu dəyişdirəcək. Bu, Avropa ilə Mərkəzi Asiyanı heç vaxt olmadığı qədər yaxınlaşdıracaq”.
Siyasi şərhçi Kazım Kazımov "Sherg.az"a deyib ki, AK Prezidenti mühüm bir nöqtədən danışsa da, bölgənin reallıqlarını tam olaraq ifadə etməyib:
"Bu gün Transxəzər Beynəlxalq Nəqliyyat Dəhlizinin açılması Asiya və Avropa arasında ticari əlaqələrin inkişafına vacib töhfə verər. Digər tərəfdən Ursula von der Leyen Ermənistan- Türkiyə sərhədlərinin açılmasından bəhs edir, amma Zəngəzur dəhlizindən danışmır. Biz bilirik ki, Ermənistanın öhdəliyi var, lakin yerinə yetirilmir. Hər kəsə məlumdur ki, Bakı-İrəvan münasibətləri normallaşmasa, İrəvanla Ankara arasında da baş verməyəcək. Ursula von der Leyen bunu fərqli məsələlərmiş kimi təqdim etməyə çalışır. Bu isə diplomatların söz oyunudur. AK həqiqətən prosesin inkişaf etməsini istəyirsə, Zəngəzur dəhlizi mövzusunda Ermənistana təzyiq göstərməlidir. Lakin təəssüflər olsun ki, hazırda belə bir iradə görmürük".
