Zakir Həsənovun Türkiyəyə səfəri çərçivəsində həm quru, həm hava qoşunlarına yönəlik bəzi məsələlər müzakirə olunub
Azərbaycanın müdafiə naziri general-polkovnik Zakir Həsənov Türkiyəyə işgüzar səfəri çərçivəsində Eskişəhərdə 1-ci Aviasiya bazasının komandiri general-mayor Ertan Uzun ilə görüşüb. Görüşdə hərbi, hərbi təhsil sahələrində əməkdaşlıq və qarşılıqlı maraq doğuran bir çox məsələlərə dair ətraflı fikir mübadiləsi aparılıb. Sonra milli müdafiə naziri Yaşar Güler ilə birgə 2023-2024-cü uçuş təlim ilinin açılış mərasimində iştirak edib. Uçuş əmri verildikdən sonra qonaqlar qardaş ölkənin hərbi aviasiya vasitələrinin uçuşlarını izləyiblər. Daha sonra general-polkovnik Z.Həsənov Ankaraya gəlib. Burada Türkiyə Cümhuriyyəti Silahlı Qüvvələrinin Baş Qərargah rəisi ordu generalı Metin Gürakla görüşüb. Görüşdə iki qardaş ölkənin orduları arasında hərbi əməkdaşlığın inkişaf perspektivləri və qarşılıqlı maraq doğuran bir sıra məsələlər müzakirə olunub. Sonra hər iki qardaş ölkənin müdafiə nazirləri Ankarada keçirilən "TEKNOFEST" Aerokosmik və Texnologiya festivalında iştirak ediblər. Ekspertlər mövcud şəraitdə, regionda yaranmış gərginlik müstəvisində Azərbaycan müdafiə naziri Zakir Həsənovun Türkiyəyə səfərinin xüsusi önəm daşıdığını düşünürlər.
Türkiyənin ölkəmizdəki keçmiş hərbi attaşesi general Yücel Karauz "Sherg.az"a deyib ki, Azərbaycanla Türkiyə arasında hərbi əlaqələr "bir millət, iki dövlət, tək ordu" səviyyəsindədir. Generalın sözlərinə görə, Türkiyə-Azərbaycan arasında hərbi əməkdaşlığı o qədər adiləşib ki, demək olar ki, hər ay iki ölkənin müdafiə nazirləri, generalları bir-birinə qarşılıqlı səfərlər edirlər:
"Müdafiə naziri Zakir Həsənovun Türkiyəyə rəsmi səfəri ilk növbədə Azərbaycanda hökumətin yenidən formalaşmasından sonra ənənəyə uyğun olaraq atılmış bir addımdır. Bu səfər digər yandan Cənubi Qafqazda yeni təhdidlərin, risklərin meydana çıxması fonunda da əhəmiyyət kəsb edir. Zakir Həsənovun Türkiyəyə səfəri çərçivəsində həm quru, həm hava qoşunlarına yönəlik bəzi məsələlər müzakirə olunub, həm də müdafiə sənayesi ilə bağlı məqamlar gündəmə gətirilib. Azərbaycan və Türkiyənin birgə təşəbbüsü olan "HAKİM" (Hərbi Hava Qüvvələrinin Mərkəzi İdarəetmə Mərkəzi) sayəsində birgə hava məkanına nəzarət zonası Egey dənizindən Xəzər hövzəsinə qədər genişlənəcək. İki ölkənin Hərbi Hava Qüvvələri də bu şəkildə hərəkət edə biləcək. Bu məsələ də nazirlərin görüşündə müzakirə olunub. Bu müzakirələrin kritik dönəmdə, Ermənistanın sürətli silahlanması fonunda aparılması diqqətçəkən mühüm məqamdır. Belə səfərlər dosta güvən verir, düşmənə isə qorxu salır".
