Fransa və Hindistan kimi ölkələrin dayanmadan Ermənistanı silahlandırması hər kəsə bəllidir. İndi isə Ermənistan Cənubi Koreya istehsalı olan və dağlıq əraziyə uyğunlaşdırılmış K2 tanklarının alınması imkanını nəzərdən keçirir. Bu haqda “Army Recognition” portalı Cənubi Koreya mətbuatına istinadən xəbər verib. Məlumata görə, Ermənistanın müdafiə naziri Suren Papikyan “Hyundai Rotem” tərəfindən hazırlanmış K2 Qara Panter əsas döyüş tanklarının alınması imkanlarını araşdırmaq üçün 2024-cü ilin sentyabrında Cənubi Koreyaya səfər edib. Bundan başqa, Ermənistan Təhlükəsizlik Şurasının katibi Armen Qriqoryan da sentyabrın 6-da Cənubi Koreyaya səfər edərək silah alışı məsələlərinə dair bir sıra görüşlər keçirib.
Hərbi ekspert Ədalət Verdiyev “Sherg.az”a bildirib ki, Ermənistan prioritet olaraq hazırsa sülhün əldə olunmasına deyil, silahlanaraq revanşa hazırlaşır:
“Bu baxımdan Ermənistanın hərbi-siyasi rəhbərliyinin keçirdiyi görüşlər fonunda ictimaiyyətə rəsmi İrəvanın müharibədə itirdiyi silah arsenalının bərpa olunmasına dair müəyyən siqnallar ötürülür. İndiyə qədər Ermənistanın Hindistan və Fransadan silahlandırıldığı ilə bağlı məlumatlar alırdıqsa, indi həmin siyahıya Cənubi Koreya da əlavə olunub. Hələlik bu barədə nə Cənubi Koreya, nə də “Hyundai Rotem” şirkəti rəsmi açıqlamar verməyib. Belə bir hərbi əməkdaşlığın mövcudluğuna dair rəsmi açıqlamalar olsa da, tankların alınması və nə vaxt çatdırılması ilə bağlı xəbərlər yoxdur. Xatırlatmaq lazımdır ki, Ermənistan üçün Koreya tanklarının alınması və onların texniki xidmət və servisin təşkil olunması asan məsələ deyil. Çünki Ermənistanın texniki infrastrukturu mövcud deyil. Amma böyük vəsaitlər hesabına həmin tankların alınması prespektivdə praktik olaraq mümkündür”.
Ekspert qeyd edib ki, Ermənistan silahlanması ona heç bir xoşbəxtlik gətirməyəcək:
“Ermənistana II Qarabağ müharibəsinə qədər müxtəlif ölkələr tərəfindən xüsusilə də Rusiya tərəfindən kifayəq qədər ciddi silah yardımları edilirdi. Ancaq həmin silahların heç bir Ermənistana kömək olmadı. Çünki silah əslində bir metal yığınıdır, vacib olan həmin texnikanı istifadə edən heyətin mənəvi-psixoliji vəziyyəti və onun peşəkarlığıdır. Əgər heyət peşəkar deyilsə, istənilən tank onun üçün sadəcə ağır kütləyə malik metaldır. Ermənistanın belə addımları onu uçuruma sürükləyir”.
