Ermənistanın hər hansı hərbi bloka qoşulması həm özünün, həm də bütövlükdə Cənubi Qafqaz regionunun sabitliyi üçün mənfi nəticələr doğura bilər
Ermənistanın yeni milli təhlükəsizlik strategiyası olacaq. Baş nazirin qərarı ilə əvvəlki strategiya 2020-ci il müharibəsindən iki ay əvvəl qəbul edilib.
Bu barədə erməni mediası məlumat yayıb.
Bildirilib ki, Ermənistan Baş naziri Nikol Paşinyan tərəfindən milli təhlükəsizlik strategiyasının nəzərdən keçirilməsi üçün yaradılan və Təhlükəsizlik Şurasının katibi Armen Qriqoryanın rəhbərlik etdiyi idarələrarası komissiyaya bir sıra idarə rəislərinin müavinləri, həmçinin Baş nazirin müavini Mger Qriqoryanın aparatının rəhbəri, Baş nazirin müavini Tiqran Xaçatryanın müşaviri, parlamentin müdafiə və xarici əlaqələr üzrə daimi komissiyalarının sədrləri, ordunun Baş Qərargah rəisi daxildir.
“Yeni strategiyaya ehtiyac Ermənistanın təhlükəsizlik mühitində baş verən dəyişikliklərlə əlaqədar yaranıb. Əvvəlki milli təhlükəsizlik strategiyasının qəbulundan (2020-ci ilin yayı) bəri Ermənistan ətrafında böyük dəyişikliklər baş verib və bu dəyişikliklərin dinamikasını nəzərə alaraq, biz bir müddət gözlədik və onları gözlədikdən və müəyyən dəqiqləşdirmələrdən sonra yeni milli təhlükəsizlik strategiyasını qəbul etmək qərarına gəldik”, - TŞ katibi Qriqoryan bildirib.
“Hraparak” yazıb ki, yeni milli strategiya ilə bağlı suallar var: 2020-ci ildə qəbul edilən strategiyada Ermənistanın KTMT üzvlüyü vurğulanır və bu təşkilatda fəallığını artırması nəzərdə tutulur. Hazırda isə İrəvan KTMT-də fəaliyyətini dondurub. Yeni strategiyada necə olacaq: hərbi bloklara qoşulma, yoxsa tam neytral?
Digər tərəfdən, əvvəlki strategiyada, “soyqırım” və “Qarabağın tanınması” ilə bağlı ayrıca fəsillər var. Ermənistan “Qarabağın təhlükəsizliyi”nin təminatçısı kimi təqdim olunurdu. İndi necə olacaq?
Nəşr yeni strategiyanın hazırlanmasında məqsədin Qarabağla bağlı məqamların sənəddən çıxarılması olduğunu da iddia edib.
Cross Media Təhlil Mərkəzinin analitiki, siyasi şərhçi Mübariz Göyüşlü "Sherg.az"a bildirib ki, Ermənistan yeni milli təhlükəsizlik strategiyasında bir sıra vacib məsələləri açıq şəkildə qeyd etməlidir:
"Saxta "erməni soyqırımı", Qarabağ və Türkiyənin şərqinə dair ərazi iddiaları, eləcə də regionda gərginlik yaradan digər mövzular rəsmi sənədlərdə əks olunmamalı və Ermənistan hakimiyyəti bu kimi siyasətlərdən çəkinməlidir. Yeni strategiya Ermənistanın aqressiv, təcavüzkar və militarist yanaşmalardan imtinasını əks etdirməli, sülh və əməkdaşlıq prinsiplərinə əsaslanmalıdır.
Əgər Ermənistan bu istiqamətdə addımlar atarsa, onun gələcək təhlükəsizliyi, dövlət kimi mövcudluğu və regionda normal mövqe tuta bilməsi üçün müsbət zəmin yaranacaq. Əks halda, yəni yeni milli təhlükəsizlik strategiyasında aqressiv siyasət davam etdirilərsə, bu, ölkə üçün fəlakətli nəticələrə səbəb ola bilər".
Şərhçi vurğulayıb ki, Nikol Paşinyan KTMT və Aİİ-dən uzaqlaşmaq siyasəti aparır:
"Onun məqsədi sadəcə bloklara qoşulmamaq deyil; əksinə, əgər Rusiya buna ciddi etiraz etməzsə, İrəvan NATO və Avropaya aid bütün hərbi bloklara üzv olmağa çalışacaq. Yəni Paşinyan hökumətinin əsas narahatlığı Rusiya ilə münasibətlərdən qaynaqlanır. Ümumiyyətlə, Ermənistanın hər hansı hərbi bloka qoşulması həm özünün, həm də bütövlükdə Cənubi Qafqaz regionunun sabitliyi üçün mənfi nəticələr doğura bilər. Buna görə də İrəvan bu cür siyasətdən çəkinməli və daha balanslı yanaşma sərgiləməlidir".
