Xarici ölkə vətəndaşı bura ov etmək üçün gəlmir. Onu 2000 manat cərimə etməklə məsələni bitirmək olmaz.
Biləsuvar rayonu ərazisində qanunsuz ov edən xarici ölkə vətəndaşları saxlanılıb.
Bu barədə Dövlət Ekoloji Təhlükəsizlik Xidməti məlumat yayıb.
Araşdırma zamanı onların Birləşmiş Ərəb Əmirlikləri vətəndaşları Matar Mohammed Karam Al Mandoos Alblooshi və Obaid Juma Obaid Zayed Alketbi olduğu müəyyən edilib.
Faktla bağlı inzibati protokol tərtib edilərək qanun pozucularının hər birinə 2000 manat məbləğində cərimə tətbiq olunub.
Mövzu ilə bağlı fikirlərini bölüşən ekoloq Qorxmaz İbrahimli "Sherg.az"a bildirib ki, indi ov sezonu deyil:
“Hazırda heyvanlar və quşlar döl və artım dönəmindədirlər. Ona görə də balıq xaricində başqa heyvanları ovlamaq qadağan olunmalıdır. Lakin bu xarici ölkə vətəndaşlarının da günahı deyil. Qanunlarımızda boşluqlar olduğu belə hadisələr baş verir. Xarici ölkə vətəndaşı bura ov etmək üçün gəlmir. Onu 2000 manat cərimə etməklə məsələni bitirmək olmaz. Hesab edirəm ki, bunların hamısı qanunda olan boşluqlardan irəli gəlir. Ümumiyyətlə, biz ov mədəniyyətimizi formalaşdıra bilməmişik. Xüsusən 1990-cı illərin sonu, 2000-ci illərin əvvəli ovçuluğun, ekologiyamıza vurduğu böyük zərərlərlə yadda qaldı. Yəni Bakı yaxınlığında, Şamaxı, Xızı, Şabran, Quba, Qusar, Şəki, Zaqatala, Qax dağlarında qanunsuz ovlanan xeyli canlıların kökünü kəsdik. Ona görə də dağlarımızda kəklik, dovşan qalmadı. di. Amerikan vətəndaşları ayı, dağ kəlləri ovuna gedirdilər. Yəni belə şeylər yolverilməz olmalıdır. Bu qanunla birgə həll olunmalıdır”.
