Bu ilin yanvar-fevral aylarında Azərbaycanda 29,3 ton yod istehsal edilib.
Trend bu barədə Dövlət Statistika Komitəsindən məlumat əldə edib.
Məlumata görə, yod istehsalı ötən ilin eyni dövrü ilə müqayisədə 6,1% və ya 1,9 ton azalıb.
Belə ki, ötən ilin yanvar-fevral aylarında Azərbaycanda 31,2 ton yod istehsal edilib.
Qeyd edək ki, cari ilin ilk iki ayında ölkədə kimya sənayesi, əczaçılıq məhsullarının, rezin və plastik kütlə məmulatlarının istehsalı sahələrində 363,9 milyon manatlıq məhsul istehsal edilib. Əvvəlki ilin müvafiq dövrü ilə müqayisədə əczaçılıq məhsullarının istehsalı 21,4%, kimya sənayesi məhsullarının istehsalı 11,4% artıb, rezin və plastik kütlə məmulatlarının istehsalı isə 3,6% azalıb.
Professor Adil Qeybulla “Sherg.az”a açıqlamasında deyib ki, yod çatışmazlığı, tiroid hormonlarının istehsalını tənzimləyən yodun orqanizmə kifayət qədər daxil olmaması nəticəsində yaranır:
“Yod çatışmazlığına qarşı tədbirlər görülməsi vacibdir, çünki bu vəziyyət tiroid problemləri, zəif inkişaf və digər sağlamlıq problemlərinə yol aça bilər. Yodun orqanizmə qəbulu qida maddələri ilə həyata keçirilir. Bəzi regionlarda yodun və florun çatışmamasına görə endogen zob xəstəliyi və endemik zob xəstəliyi inkişaf edir. Yəni endemik o deməkdir ki, rasionda yod çatışmır. Ona görə də SSRİ vaxtı həmin qidalara yod əlavə edirdilər. Hazırda da yodlu duzlar var və həmin duzlar bundan ötrü nəzərdə tutulur. Mən düşünürəm ki, insanlar zaman zaman meyvə, tərəvəz, müxtəlif qidalarla orqanizmin yoda olan ehtiyacını təmin edib. Yaxşı olar ki, yodu qida ilə birgə alaq”.
