Qafanda konsulluğun açılması ikitərəfli münasibətlərə ciddi təsir göstərməyəcək
Tofiq Abbasov: Erməni cəmiyyətində Rusiya ilə bağlı etirazlı ab-hava, rusafobiya var
Ermənistan tərəfi hələ də Rusiyanın Qafanda baş konsulluğunun açılmasının ləngiməsinin səbəblərini açıqlamır.
Bu barədə “Sputnik Ermənistan” Ermənistan Xarici İşlər Nazirliyinə istinadla məlumat yayıb.
“Sputnik Ermənistan” Baş nazir Nikol Paşinyana müvafiq sorğu göndərərək prosesin hansı mərhələdə olduğunu, konsulluğun niyə hələ də açılmadığını və ləngimənin nədən ibarət olduğunu soruşub. Cavab Ermənistan Xarici İşlər Nazirliyindən gəlib.
“Sizə bildiririk ki, qaldırılan məsələlərlə bağlı inkişaf olarsa, ictimaiyyətə məlumat veriləcək”, - Ermənistan XİN-in cavabında deyilir.
Xatırladaq ki, Rusiyanın Sünik vilayətində (Qərbi Zəngəzur) baş konsulluğunun açılması məsələsinin müzakirəsi üç ilə yaxındır davam edir. 2023-cü ilin sentyabr ayından etibarən açılışın hazırlanmasına cavabdeh olan qrup Qafanda fəaliyyət göstərir. Bu ilin martında Ermənistan Xarici İşlər Nazirliyi prosesin iki ölkə arasında danışıqlar mərhələsində olduğunu bəyan etmişdi.
Rusiyadan son olaraq bu ölkənin Xarici İşlər Nazirliyinin sözçüsü Mariya Zaxarova bildirmişdi ki, gecikmələrin səbəbi Ermənistan tərəfi ilə bağlıdır.
Politoloq Tofiq Abbasov Sherg.az-a söyləyib ki, konsulluğun açılması adətən vətəndaşların gediş-gəlişi və ortaq məsələlərin həlli ilə bağlı olur:
"Hazırda Moskva-İrəvan münasibətləri soyuqdur. Digər tərəfdən Rusiya vətəndaşları əsasən İrəvanda birlik formasında yaşayır. Həmçinin erməni cəmiyyətində Rusiya ilə bağlı etirazlı ab-hava, rusafobiya var. Belə olduğu halda Rusiya bu məsələlərə həssas yanaşmalıdır. Eyni zamanda Moskva və Tehran Ermənistanla bağlı özünəməxsus xüsusi siyasət yeridir. Həmçinin Azərbaycanla münasibətlər kontekstində hər iki ölkənin fərqli mövqeyi mövcuddur. Onlar ilk növbədə Ermənistana belə bir fikir təlqin edirlər ki, onu tək qoymurlar və dəstək olurlar. Digər tərəfdən konsulluğun açılmasının çağırışlarla nə dərəcədə uzlaşması sual altındadır. Nə Ermənistan, nə də Rusiya vətəndaşlarının gediş-gəlişi və s. məsələlərdə Rusiyanın hər hansı problemi yoxdur".
Politoloqun fikrincə, Qafanda konsulluğun açılması ikitərəfli münasibətlərə ciddi təsir göstərməyəcək:
"Əslində bu, daha çox piyar məsələsidir. Qafan xüsusi strateji region belə deyil. Kənar təsirlərə gəlincə, Qərbin Ermənistanı sınaması mümkündür. Nəzərə alaq ki, 9 May - Qələbə günündə Paşinyan Rusiyada keçirilən paradda yer aldı. Hər halda Ermənistan rəhbərliyi iki stul üzərində oturmağa cəhd göstərir. İrəvan Rusiya ilə münasibətləri gücləndirməsə də, imtina etmir. Ümumiyyətlə Ermənistanın xarici siyasəti çox axsaqdır və uzun müddət bu cür davam edə bilməz".
