Rusiya Xarici İşlər Nazirliyinin sözçüsü Mariya Zaxarova sentyabrın 18-də keçirdiyi brifinqdə Ermənistan mətbuatını aşağılayıb.
Axar.az xəbər verir ki, o, rusiyalı jurnalistin erməni mediasının Rusiya tərəfinin respublika rəhbərliyinin müstəqil qərarlarını guya nəzərə almaq istəmədiyi və “böyüklük” rolunu oynamağa davam etməsi ilə bağlı təbliğatına cavab verib.
Zaxarova Ermənistan mediasında çoxsaylı “primitiv”, “qəribə şeylər” gördüklərini, hətta “Ermənistanın guya (Rusiya tərəfdən) hibrid hücuma məruz qalması” barədə “vicdansızcasına” informasiya yayıldığını bildirib.
"Moskva respublikanın inkişafına mane olur - mən belə şeyləri oxumuşam, məsələn, suveren dövləti Rusiya öz quberniyası kimi görür. Bilirsiniz, bunları ortaya atanlar özlərini alçaldırlar”, - Zaxarova deyib.
Onun sözlərinə görə, o, heç vaxt, heç yerdə Rusiya rəsmiləri və ya siyasətçilərinin ritorikasında açıq şəkildə və ya bağlı qapılar arxasında, yazılı və ya şifahi şəkildə belə uydurmalarla rastlaşmayıb:
“Mən heç vaxt Rusiya rəhbərliyindən, məsuliyyətli rus siyasətçilərindən heç kimin Ermənistanla bu cür rəftar etdiyini və ya danışdığını eşitməmişəm.
Moskva hər zaman respublikanın seçiminə hörmətlə yanaşıb, erməni dostlarının arqumentlərini və səbəblərini diqqətlə dinləyib, onların müstəqil qərarlarını nəzərə alıb, hadisələrə öz baxış bucağına malik olub və bir daha deyirəm, ölkənin suverenliyinə hörmətlə yanaşıb. Və biz tərəfdaşlarımızdan Rusiyanın narahatlığına eyni şəkildə yanaşıb, onları nəzərə almasını gözləyirik”.
