Fransanın Baş naziri Sebastyan Lökornü 2026-cı il büdcə müzakirələrinin gedişində hökumətin vəziyyətinin son dərəcə həssas olduğunu etiraf edib. “İstənilən anda yıxıla bilərik”, - deyə o, “Le Parisien” və “La Tribune Dimanche” qəzetlərinə verdiyi müsahibədə bildirib.
O, həmçinin qeyd edib: “Əgər müxalifət bizə senzura tətbiq etmək istəyirsə, edəcək. Mən vəziyyətin tam fərqindəyəm. Əgər ölkənin xeyri üçün işləmək istəyənlər oyunu qaydalara görə oynasa, biz bunu bacaracağıq”.
AZƏRTAC xəbər verir ki, Fransa hökuməti hazırda Milli Assambleyada mütləq çoxluğa malik deyil. Bu isə büdcə səsvermələrini hökumət üçün ciddi sınağa çevirir.
Baş nazir etiraf edib ki, hökumət hazırda eniş zolağında “irəliləyir” və hər büdcə maddəsi potensial olaraq hökumətin buraxılmasına səbəb ola bilər.
Həmçinin S.Lökornü müsahibəsində “Zukman vergisi” (yüksəkgəlirli şəxslərin sərvətinə yönəlmiş təklif) ilə bağlı yaranan siyasi mübahisəni artıq bağlanmış məsələ adlandırıb. “Bu, indi artıq növbəti prezident seçkiləri üçün bir debatdır”, - deyə o qeyd edib. Hökumət bu verginin parlamentdə rədd edilməsindən sonra sosialistlərə yaxınlaşmaq və kompromis əldə etmək cəhdləri ilə gündəmdədir.
Baş nazir müxalifətdəki Sosialist Partiyası (PS) ilə gizli razılaşma barədə iddiaları qəti şəkildə təkzib edib. O, sosialistlərə dolayısı ilə mesaj göndərib. “Bəzi PS üzvləri əldə olunan irəliləyişləri “davamlı şəkildə qorumaqda çətinlik çəkirlər”, - deyə Baş nazir bildirib.
