ABŞ kəşfiyyatı Çinin İrana ballistik raket potensialını yenidən bərpa etməkdə yardım göstərmək cəhdlərini diqqətlə izləyir və bu fəaliyyətlərlə bağlı məlumatlar gündəlik olaraq İsrailə ötürülür.
Teleqraf xəbər verir ki, bu barədə “Defense Network” məlumat yayıb.
Hesabata görə, Çin İrana birbaşa hazır raketlər göndərmək əvəzinə, məhdud həcmdə hərbi avadanlıq, sənaye materialları və ikili təyinatlı məhsullar tədarük etməklə Tehrana yardım edir. Mənbələr bu yardımların üç əsas marşrutunu müəyyən ediblər. Birinci marşrut kimyəvi maddələrin və ilkin xammalın İrana göndərilməsidir.
Hesabatda qeyd olunur ki, İran raketlər üçün bərk yanacaq istehsal etmək məqsədilə Çindən böyük həcmdə ammonium perxlorat və digər kimyəvi maddələr alıb. Bu materiallar yüzlərlə ballistik raketin hazırlanmasında istifadə oluna bilər.
İkili təyinatlı mallar və ehtiyat hissələri ekspertlərin diqqət yetirdiyi ikinci istiqamətdir. Bu avadanlıqlara alətlər, elektron komponentlər və raketlərin istehsalı, sınağı və buraxılış infrastrukturu üçün istifadə olunan sistemlər daxildir.
Məlumata görə, bu yüklərin bir hissəsi ABŞ xüsusi təyinatlı qüvvələri tərəfindən dənizdə ələ keçirilib.
Məhdud həcmdə hərbi və müdafiə avadanlığının daşınması isə gündəmə gətirilən digər variantdır.
Hesabata əsasən, 2025-ci ildə Çin və Rusiyanın nəqliyyat təyyarələri hava hücumundan müdafiə sistemləri, raket hissələri və digər hərbi ləvazimatları İrana çatdırıblar.
“Defense Network” əlavə edir ki, Çin bu yolla İranın raket və hava hücumundan müdafiə imkanlarını gücləndirir, həmçinin Tehrana hazır ballistik raketlər vermədən və diplomatik böhrana səbəb olmadan hərəkət edir.
Ekspertlərin fikrincə, bu yardımlar ölçülə bilən və aşkardır, amma Çin onları rəsmi şəkildə inkar etməyə və ixrac qaydalarına əməl etdiyini göstərməyə çalışır.
