Ukraynanın müdafiəsi üzrə Əlaqə Qrupunun (“Ramştayn” formatı) 30-cu iclası 9 sentyabr 2025-ci ildə Londonda baş tutacaq.
Bu barədə Almaniya Müdafiə Nazirliyinin nümayəndəsi Ukrayna mediasına açıqlama verib. Bildirilib ki, toplantı qarışıq formatda – həm fiziki, həm də onlayn iştirakla keçiriləcək. Nazirliyin sözçüsü gündəlik üzərində məsləhətləşmələrin davam etdiyini və hazırda bu barədə detallı açıqlama verilmədiyini qeyd edib.
Qeyd edək ki, “Ramştayn” formatı ilk dəfə 2022-ci ilin aprelində ABŞ-ın təşəbbüsü ilə Almaniyanın Ramştayn aviabazasında təşkil olunub. Məqsəd Ukraynaya hərbi yardımın koordinasiyası idi. O vaxtdan etibarən bu platforma 50-dən çox ölkəni birləşdirərək Ukraynaya dəstəyin əsas beynəlxalq mexanizmlərindən birinə çevrilib.
Əvvəlki görüşlərdə də Ukraynaya mühüm dəstək qərarları qəbul olunub.
Müşahidəçilər hesab edirlər ki, Londonda keçiriləcək 30-cu görüşdə qəbul olunacaq qərarlar Ukraynanın qarşıdan gələn payız və qış aylarında müdafiə imkanlarının formalaşmasında həlledici əhəmiyyət daşıyacaq.
Politoloq Əhəd Məmmədli Sherg.az-a bildirib ki, Avropanın Ukraynaya hərbi dəstək vermək gücü məhduddur:
"Hazırda Qərb ölkələri içində Ukraynaya real şəkildə silah dəstəyi verə bilən yeganə ölkə ABŞ-dır. Avropa isə daha çox Vaşinqtona güvənir. Avropa ölkələri büdcədə hərbi xərcləri təxminən 5% artırmaq niyyətindədirlər, amma bu da kifayət deyil. Çünki silah istehsalı üçün zavodlar, fabriklər, təchizat zənciri lazımdır və bunların qurulması vaxt və böyük maliyyə tələb edir. Əlavə olaraq, hərbi xərclərin artırılması sosial sahələrdə ixtisarlara səbəb olur. Bu isə ictimai narazılıq və müxalifətin etirazları ilə nəticələnir. Rusiyada olduğu kimi avtoritar idarəetmənin olmadığı üçün Avropada bu addımlar daha çətinliklə atılır. Bununla belə, Avropa məcburən silahlanmağa və müdafiəsini gücləndirməyə başlayıb. Ukrayna müharibəsi Avropaya göstərdi ki, firavanlıq və sabitlik daim zəmanətli deyil. Həmçinin müharibə yalnız Yaxın Şərqdə və ya başqa bölgələrdə yox, Avropanın özündə də baş verə bilər.
Amma ümumi mənzərə belədir: Avropa Ukraynaya dəstək vermək və eyni zamanda öz təhlükəsizliyini gücləndirmək istəyir. Lakin uzunmüddətli perspektivdə ABŞ-ın dəstəyi olmadan Ukraynanın Rusiyaya qarşı dayanıqlı müqavimət göstərməsi mümkün deyil".
