Rusiyanın Ukrayna sərhədinə yaxın Rostov bölgəsində keçirilən hərbi düşərgədə uşaqlara əl qumbarası simulyasiyaları və atış təlimləri keçirilib.
Sherg.az xəbər verir ki, rus hərbiçi öz qızını da proqrama cəlb edərək uşaqlara təcrübələrini bölüşüb.
“Reuters”ə danışan iştirakçı uşaqlardan Anton, “Burada olmağımın səbəbi gələcəyimi ordu ilə bağlamaq istəməyimdir. Ölkəmə xidmət edib dəyərlərimi sonadək müdafiə etmək istəyirəm,” deyib.
Başqa bir şagird David isə yürüş təlimlərinin iradəsini sınadığını bildirib. Uşaqların çoxu kamuflyaj geyimlərində olub; bəziləri həqiqi silah, bəziləri isə oyuncaq replika daşıyıb.
Müstəqil uşaq hüquqları təşkilatı “Ne Norma” uşaqlara silah istifadəsi və pilotsuz uçuş aparatlarının hazırlanması kimi mövzuların öyrədilməsini “beyin yuma və təbliğat” adlandırır.
Rəsmi şəxslər isə bu təlimlərin “sağlam vətənpərvərlik aşılanması və milli şüurun artırılması” məqsədi daşıdığını bildirir.
Təlimçilər arasında Ukraynada yaralanmış və əməliyyat gözləyən rus hərbiçisi Aleksandr Şopin də olub.
Öz qızının da düşərgəyə qatıldığını deyən Şopin, “Təcrübələrimi uşaqlara ötürmək xoşuma gəlir. Onların bir ailə kimi birləşdiyini görə bilirsiniz,” deyib.
Təlimdən sonra uşaqlar həyəcanlarını gizlətməyib. Bir qız “Az qalsın öləcəkdim!” deyib, digər yoldaşı isə “Qaçışı üç dəfə etdik!” sözləri ilə onu qucaqlayaraq təbrik edib.
Başqa bir təlimçi Vladimir Yanenko isə, “Vətənpərvərlik təlimi çox vacibdir. Uşaqlar küçələrdə vaxt keçirmək istəmir. Onlar üçün bura daha maraqlıdır,” ifadələrini işlədib.
