İsveçdə hökumət katibliyində təhlükəsizliklə bağlı yeni qalmaqal alovlanıb.
AZƏRTAC xəbər verir ki, “Dagens Nyheter” qəzetinin müəyyən etdiyinə əsasən, 2022-ci ilin noyabrında Baş nazir Ulf Kristerssonun Türkiyəyə səfərindən sonra Arlanda hava limanında onun gizli sənədlər olan xidməti qovluğu unudulub.
Qovluğu terminalda təmizlik işçiçi tapıb. Nəşrin məlumatına görə, sənədlərin bir hissəsi xarici siyasət sirrinə aid olub və onların açıqlanması İsveçin digər dövlətlərlə münasibətlərinə zərər vura bilərdi. Buna baxmayaraq, hadisə Təhlükəsizlik Xidmətinə ötürülməyib, çünki hakimiyyət həmin sənədlərin “qorunan” kateqoriyasına aid olmadığını hesab edib.
Hadisəni həm politoloqlar, həm də müxalifət kəskin tənqid edib. Professor Yoran Sundström vəziyyəti “İsveç və onun beynəlxalq tərəfdaşları üçün rüsvayçılıq” adlandırıb. Onun sözlərinə görə, bu cür insidentlər ölkəyə müttəfiq kimi etimadı sarsıdır.
“Bu, sadəcə səhlənkarlıq deyil. Bu, digər dövlətlərə qarşı utancvericidir”, – deyə professor vurğulayıb.
Sol Partiya Konstitusiya Komitəsinə şikayət edəcəyini bəyan edib və hökuməti gizli materiallarla səhlənkar davranmaqda günahlandırıb.
“Bu, hökumətin qorunan sənədlərlə işləməkdə bacarıqsızlığını göstərən daha bir hadisədir”, – deyə partiyanın xarici siyasət məsələləri üzrə nümayəndəsi Hokan Svennellinq bildirib.
Partiyanın lideri Nuşi Dadqostar isə X sosial şəbəkəsində yazıb: “Kristerssonun katibliyi yenə də itirilmiş gizli sənədlər barədə məlumat vermir. İnanılmazdır”. Onun partiyadaşlarından Yonas Şostet isə əlavə edib: “İndi isə gözləyirik ki, NATO-ya qoşulmaqla bağlı gizli sənədləri kiminsə Hornstuldakı Lion barında tapmasını eşidək”.
Qalmaqal, həm də Kristerssonun Türkiyə səfərindən az sonra onun uşaqlıq dostu Henrik Landerholmun milli təhlükəsizlik üzrə müşavir təyin olunması fonunda güclənib. O artıq bir neçə gizli məlumat insidentinə yol verib və dövlət sirri ilə səhlənkar davranmaqda ittiham edilərək istintaqa cəlb olunub.
