Bu gün İsveçdə parlament seçkiləri keçirilir.
APA xəbər verir ki, seçkidə 349 deputatın yer aldığı İsveç parlamentinə (birpalatalı Riksdaq), eləcə də yerli özünüidarəetmə orqanlarına nümayəndələr seçilməlidir.
Skandinaviya ölkəsini XX əsrin böyük hissəsində idarə etmiş Sosial Demokratlar Partiyasının lideri və müxalifətin rəhbəri Maqdalena Andersson bildirib ki, solçu dörd partiya parlamentdə çoxluq qazansa, sosial təminat dövlətini gücləndirəcək və artan xərclərlə mübarizə aparan ailələrə kömək edəcək.
Hazırkı mühafizəkar Baş nazir Ulf Kristersson isə hökumətinin mütəşəkkil cinayətkarlıq və immiqrasiyaya qarşı sərt tədbirləri nəzərdə tutulan nəticələri verdikdən sonra diqqətini isveçlilərin gündəlik həyat şəraitinin yaxşılaşdırılmasına yönəldəcəyinə söz verib.
Ulf Kristersson son dörd il ərzində ifrat sağçı İsveç Demokratlarının dəstəyi ilə hökumətə rəhbərlik edib və sağçı dörd partiya seçkilərdə qalib gəldiyi təqdirdə immiqrasiyaya qarşı mövqeyi ilə tanınan bu partiyanın nümayəndələrinə ilk dəfə hökumətdə vəzifələr verəcəyini vəd edib.
Səsvermə məntəqələri yerli vaxtla saat 20:00-da bağlanacaq. Həmin vaxt exit-poll nəticələri açıqlanacaq, seçkinin ilkin nəticələrinin isə bir neçə saat sonra məlum olacağı gözlənilir.
