Niderland hakimiyyəti Ukraynadan gələn 1700-ə yaxın üçüncü ölkə vətəndaşını öz ərazisindən çıxara bilər.
“Report” xəbər verir ki, bu barədə NU portalı Niderlandın Dövlət Şurasının qərarına istinadən məlumat yayıb.
Dövlət Şurası qərara alıb ki, krallığın miqrasiya orqanları Ukraynadan gələn üçüncü ölkə vətəndaşlarının qəbulunu dayandırmaq və Ukrayna vətəndaşlığı olmayan qaçqınları ölkədən çıxarmaq hüququna malikdir. Portalın qeyd etdiyi kimi, onların çoxu münaqişə başlamazdan əvvəl Ukraynada işləmiş və ya təhsil almış əcnəbi vətəndaşlardır.
Avropa Ədalət Məhkəməsi də əvvəllər qərar verib ki, Aİ ölkələri bu qrup insanlara sığınacaq verilməsini vaxtından əvvəl ləğv edə bilər. Eyni zamanda, Miqrasiya və Sığınacaq Naziri Marjolijn Faber 2024-cü ildə üçüncü ölkə vətəndaşlığı olan ukraynalı qaçqınların Niderlanddan çıxarılmasının tərəfdarı olub.
Niderlandın İmmiqrasiya və Naturalizasiya Xidmətinin məlumatına görə, ölkədə Ukraynadan gələn 1700-ə yaxın üçüncü ölkə vətəndaşı var. Onların ölkəni nə vaxt tərk etməli olacaqları hələ də bəlli deyil.
