Gürcüstan hakimiyyəti ABŞ-dan ölkələr arasında münasibətləri normallaşdıracaq qarşılıqlı addımlar gözləyir.
APA xəbər verir ki, bu barədə jurnalistlərə ölkənin baş naziri İrakli Kobaxidze məlumat verib.
“ABŞ qlobal təsiri olan çox böyük bir ölkədir, bizim münasibətlərimizdə çox şey dəyişə bilməz. Hər şey amerikalı tərəfdaşlarımızın əlindədir. Qarşılıqlı addımlar gözləyirik. Əgər yanaşmalar əhəmiyyətli dərəcədə dəyişdirilərsə, heç bir şey münasibətlərin yenidən başlamasına mane olmayacaq. Əsas olan ədalət, ədalətli yanaşmadır” – Kobaxidze deyib.
Gürcüstan hökumətinin başçısı avqustun 10-da Tbilisidə amerikalı senator Jeanne Shaheen və konqresmen Mayk Turner ilə keçirilən görüşü şərh edib. O qeyd edib ki, görüşdə Gürcüstanla ABŞ arasında münasibətlərin keçmiş Amerika səfiri Kelli Deqnan tərəfindən korlandığını deyib.
Baş nazirin sözlərinə görə, 2021-ci ildə ABŞ-ın keçmiş səfiri Gürcüstanda növbədənkənar parlament seçkiləri keçirmək cəhdində iştirak edib və 2022-ci ilin iyununda respublikaya Aİ-yə namizəd statusu verilmədikdən sonra Deqnan “inqilabi proseslərdə” iştirak edib.
