İran isə danışıqlarda daha yaxşı şərtlər üzərində mübarizə aparır
İranın nüvə proqramı ilə bağlı aparılan danışıqlar yaxşı gedir və razılaşmanın əldə olunması bir çox insanın həyatını xilas edə bilərdi.
Bunu ABŞ Prezidenti Donald Tramp Ağ Evin Oval kabinetində jurnalistlərin suallarını cavablandırarkən bildirib.
Tramp qeyd edib ki, düşünürəm ki, İranla bağlı vəziyyətimiz çox yaxşıdır. Çox ciddi görüşlərimiz keçirilir. Amma hadisələrin yekununa dair yalnız iki variant var. Onlardan biri yaxşı variant deyil.
Cənubi Qafqaz Tədqiqatlar Mərkəzinin rəhbəri, politoloq Fərhad Məmmədov Sherg.az-a bildirib ki, ABŞ İranla ikitərəfli razılaşma istəyir:
“Həmin razılaşmanın şərtələri keçmiş müqavilədən daha kəskindir. İran tərəfi danışıqlarda daha konstruktiv görsənməyə meyillidir. ABŞ-nin İrandan gözləntiləri nüvə proqramı və Tehranın regional siyasətiylə bağlıdır. Amerika İrandan təkcə nüvənin istehsalını deyil, həmçinin nüvə silahının daşıyıcısı olan raketlərin proqramını dayandırmağı tələb edir. Eyni zamanda Amerika və İsrail Qəzzada, Suriyada və Yəməndə İranı dəstəkləyən qrupların infrastrukturunu dağıdıb. Lakin bu istamətdə danışıqlar aktual deyil. Əsas şərt Amerikanın iştirakıyla MAQATE tərəfindən İranın nüvə istehsalına tam nəzarət və raket proqramıyla bağlı məhdudiyyətlərin qoyulmasıdır ki, bu isə Tehran tərəfindən qəbuledilməz kimi qarşılanır. Bu mənada deyə bilərik ki, İran danışıqlarda daha yaxşı şərtlər üzərində mübarizə aparır. Digər tərəfdən İran konstruktiv görünməyə çalışsa da, daxildəki bəzi qüvvələr danışıqlardan çox narahatdır. Çünki danışıqlarda regional siyasət və nüvə proqramıyla bağlı məhdudiyyətlər razılaşdırılsa, həmin radikal qrupların resurslarını azaldacaq. Sözügedən məsələ daha çox SEPAH-a aiddir”.
