Şimali Koreya rəhbərliyi Ukraynaya qarşı döyüşmək məqsədilə Rusiyaya əsgər göndərdiyini ilk dəfə rəsmi şəkildə təsdiqləyib.
Sherg.az xəbər verir ki, iki ölkə arasında imzalanmış strateji tərəfdaşlıq sazişi çərçivəsində baş tutan bu dəstək, uzun müddət bütün dünyanın gözü qarşısında həyata keçirilsə də, indiyə qədər Şimali Koreya tərəfindən rəsmi olaraq təsdiqlənməmişdi.
Son açıqlama ilə Rusiyaya əsgər göndərilməsi qərarının birbaşa ölkə lideri Kim Çen In tərəfindən verildiyi təsdiqlənib.
Bu açıqlamadan dərhal sonra Rusiya tərəfindən də qarşılıqlı dəstək bəyan edilib.
Kremlin sözçüsü Dmitri Peskov bildirib: "Zərurət yaranarsa, Rusiya da Şimali Koreyaya hərbi dəstək göstərə bilər."
Şimali Koreya lideri Kim Çen In və Rusiya Prezidenti Vladimir Putin ötən ilin iyun ayında Əhatəli Strateji Tərəfdaşlıq Anlaşması imzalamışdılar.
Putin, bu anlaşmanın "Tərəflərdən birinə qarşı xarici hücum halında qarşılıqlı yardımı" da ehtiva etdiyini vurğulamış və "Rusiya bu saziş çərçivəsində Şimali Koreya ilə hərbi-texniki əməkdaşlığı da nəzərdən keçirir" ifadəsini işlətmişdi.
Baş verən hadisələrdən sonra Şimali Koreyanın Rusiyaya əsgər göndərdiyi üzə çıxmışdı. Bildirildiyinə görə, Şimali Koreya əsgərləri Rusiyanın Kursk bölgəsində Ukraynaya qarşı döyüşür və ciddi itkilər verirlər. Lakin Şimali Koreya bu əsgər göndərişini indiyədək rəsmi olaraq təsdiqləməmişdi.
