Slovakiyanın altı böyük şəhərində minlərlə fəalın iştirakı ilə hökumət əleyhinə etiraz aksiyaları keçirilib.
Trend xəbər verir ki, bu barədə ölkənin “Markiza” telekanalı məlumat yayıb.
Ən genişmiqyaslı aksiya paytaxt Bratislavada təşkil olunub. Etirazçılar hökumətdən qeyri-hökumət təşkilatlarının fəaliyyətinə dair qaydaların sərtləşdirilməsi planlarından imtina etməyi tələb ediblər. Aksiya zamanı Slovakiya hökumətinin Rusiya ilə yaxınlaşma siyasəti də sərt tənqid olunub. Eyni zamanda, etirazçılar Ukraynaya dəstək ifadə edib və Baş nazir Robert Fitso rəhbərliyindəki hazırkı hökumətin istefasını tələb ediblər.
Aksiyalara müxalifətə yaxın vətəndaş təşəbbüsləri təşkilatçılıq edib. Slovakiya ilə yanaşı, Çexiyanın Brno şəhərində də etirazçılarla həmrəylik aksiyası keçirilib.
Telekanalın məlumatına görə, cümə günü Slovakiyanın daha 16 kiçik şəhərində oxşar aksiyalar keçirilməsi planlaşdırılır. Həmçinin Brüssel, London, Oslo və Stokholmda da etirazlara dəstək məqsədilə mitinqlər təşkil ediləcək.
